विराटचोकः आप्रवासी महिला कामदर समूह (आमकास) मोरङले ११२ औँ अन्तर्राष्ट्रिय महिला दिवसको अवसर पारेर ३ जना श्रमिक महिलालाई सम्मान गरेको छ ।

समूहले सुन्दरहरैंचा–८ का विष्णुमाया दर्जी र पन्नामाया दर्जी तथा सुन्दरहरैंचा– ४ की गंगा परियारलाई सम्मान गरेको हो । उनीहरुलाई दोसल्ला तथा नगदले सम्मान गरिएको हो ।

त्यस्तै, कार्यक्रममा समूहको सदस्यता लिएका ५ जना नवप्रवेशीलाई स्वागत गरिएको थियो । इजरायलमा काम गरेर फर्किएका देवीकुमारी न्यौपाने र सुनिता घिमिरे, दुबईमा काम गरेर स्वदेश फर्किएकी शर्मिला चन्द तथा कुबेतमा श्रम गरेर फर्किएका सीता भण्डारी र विष्णुकुमारी दर्जीलाई कार्यक्रममा स्वागत गरिएको थियो ।

कार्यक्रमलाई प्रमुख अतिथिको आसनबाट सम्बोधन गर्दै सुन्दरहरैंचा नगरपालिकाकी कार्यपालिका सदस्य उर्मिला रिजालले अहिले पनि पित्तृसत्तात्मक सोचका कारण परिवारदेखि नै नजानिँदो तरिकाले महिला हिंसा हुने गरेको बताइन् । बच्चालाई खेलौना किन्ने क्रममा छोरालाई मोटरसाइकल र छोरीलाई भाँडाकुटी किनिदिने आम चलनले त्यसलाई प्रष्ट पार्ने उनको भनाइ थियो । महिला जति शिक्षित भए पनि र जति धेरै बोल्न सक्ने भए पनि धेरै काम गर्न महिलाले नै आँट नगर्ने हुनाले पछि पर्ने गरेको उनले सुनाइन् ।

कार्यक्रमलाई सम्बोधन गर्दै मनोविमर्शकर्ता सुशीला पाठकले असमानता, सुरक्षा, लैंगिक विभेदजस्ता हिंसा समाजमा अहिले पनि व्याप्त रहेको बताइन् । आफन्त र चिनजानका व्यक्तिबाट नै बलात्कार वा अन्य हिंसामा धेरै महिला पर्ने गरेको बताउँदै उनले महिलाले कानुनी पाटो थाहा नपाउँदा पनि हिंसा सहने प्रवृत्ति घट्न नसकेको बताइन् ।

नारी विकास संघकी अध्यक्ष सुशीला कार्कीले महिलाले नै महिलामाथि विभेद गर्ने क्रम अन्त्य गर्नुपर्ने बताइन् ।

समानता महिला समाजकी उमादेवी दाहालले समाजमा रहेको विसङ्गति हटाउन महिला नै बढी जागरुक हुनुपर्ने बताइन् ।

महिला समाज नेपाल मोरङकी अध्यक्ष मञ्जु रेग्मीले नेपालकै योगमायालगायतका साहसी महिलाको जीवनीबाट पाठ सिक्दै महिला अघि बढ्नुपर्ने बताइन् ।

चिरम स्मृति प्रतिष्ठानका सचिव कोमलप्रसाद लुइँटेलले महिलामहिलाबीचमा पनि हिंसा भइरहेको हुनाले हिंसाको जड पहिल्याउनुपर्ने बताए । दाइजोको निहुँमा वा सन्तानको निहुँमा सासूले बुहारीलाई गर्ने हिंसा महिलामहिलाबीचको हिंसा रहेको उनले आँैल्याए ।

संस्थाकी सचिव इन्दिरा प्रसाई खरेलले सञ्चालन गरेको कार्यक्रम संस्थाकी अध्यक्ष उमा सेंढाईको सभापतित्वमा भएको थियो । कार्यक्रममा संस्थाकी सह सचिव गीता रिमाल बजगाईँले स्वागत मन्तव्य व्यक्त गरेकी थिइन् ।