विराटचोकः गत बैशाख ३० गते भएको स्थानीय तहको निर्वाचनमा देशका धेरै स्थानमा स्वतन्त्र उम्मेद्वारले जितेका छन् । विजयी हुन नसकेका धेरै स्वतन्त्र उम्मेद्वारले सम्मानजनक मत पाएका छन् । यसै क्रममा मधेश प्रदेशको महोत्तरी जिल्लाको बर्दिबास नगरपालिकामा स्वतन्त्र उम्मेद्वारले मेयर, उपमेयर, वडाध्यक्ष र सदस्य पदमा जितेका छन् ।

रोचक कुरा त के छ भने विजयी हुने स्वतन्त्र उम्मेद्वार सबैले जेब्रा चुनाव चिह्न लिएका छन् । वडा नम्बर १ मा दलित महिला सदस्यमा बाहेक बाँकी पदमा स्वतन्त्रले जितेका छन् । सो पदमा भने स्वतन्त्र उम्मेद्वारले मनोनयन नै दर्ता नगरेकाले नेकपा एमालेकी माला विश्वकर्मा विजयी भएकी छिन् । बाँकी ४ पदमा स्वतन्त्र उम्मेद्वार विजयी भएका छन् ।

यस्तो छ स्वतन्त्र उम्मेद्वारले पाएको मतः
मेयर पदः
मेयर पदमा स्वतन्त्र उम्मेद्वार प्रह्लादकुमार क्षेत्री १४२१० मत ल्याएर विजयी भएका छन् । उनी जेब्रा चुनाव चिह्न लिएका थिए । सो पदमा नेकपा माओवादी केन्द्रका राजु खड्काले ८३२३ र नेकपा एमालेका टेकबहादुर बलम्पाकीले ३५२६ मत ल्याएका छन् । नेपाली कांग्रेसका चिरञ्जीवी हमालले १२६३ मत ल्याएका छन् । अन्य ७ जना उम्मेद्वारले १ हजारभन्दा कम मत ल्याएका छन् । पुतली चुनाव चिह्न लिएका उम्मेद्वारले शून्य मत पाएका छन् ।

उपमेयर पदः
उपमेयरमा स्वतन्त्र उम्मेद्वार तारादेवी महतो ९७३६ मत ल्याएर विजयी भएकी छिन् । उनी पनि घोडा (जेब्रा) चुनाव चिह्न लिएर चुनावी मैदानमा खडा भएकी थिइन् । उनकी निकटतम प्रतिद्वन्द्वी माओवादी केन्द्रकी कृष्णमाया गौतमले ८१८५ मत ल्याउँदा नेकपा एमालेकी दुर्गाकुमारी दाहालले ४८०३, नेपाली कांग्रेसकी अमिनाकुमारी महतोले १७८५ र नेकपा एकीकृत समाजवादीकी कमलीमाया वाइबाले १३७० मत पाइन् । अन्य ४ जना उम्मेद्वारले ५०० मत पनि कटाउन सकेनन् भने पुतली चुनाव चिह्न लिएका उम्मेद्वारले शून्य मत पाएका छन् ।

२ जना वडाध्यक्ष १ मतान्तरले विजयी
बर्दिबास नगरपालिकाका १४ वटा वडामध्ये वडा नम्बर १, ७, १३ र १४ मा स्वतन्त्र उम्मेद्वार विजयी भएका छन् । उनीहरु सबैले जेब्रा चुनाव चिह्न लिएका छन् । तीमध्ये वडा नम्बर ७ र १४ का उम्मेद्वार १ मतको फरकले वडाध्यक्षमा निर्वाचित भएका छन् ।

वडा नम्बर १ मा स्वतन्त्र उम्मेद्वार भोला खड्का ८९६ मत ल्याएर विजयी हुँदा निकटतम प्रतिष्पर्धी एमालेका बाबुकाजी चौलागाईँले ४७२ मत ल्याएका छन् । तेस्रो स्थानमा रहेका अर्का स्वतन्त्र उम्मेद्वार निरोज अधिकारीले ४३२ मत ल्याएका छन् । उनी खरायो चुनाव चिह्न लिएर चुनावी मैदानमा खडा भएका थिए । नेकपा माओवादी केन्द्रका उम्मेद्वार हरिप्रसाद पौडेल ३७१ मत ल्याएर चौथो भएका छन् भने बाँकी ३ जना उम्मेद्वारले १०० मत कटाएका छैनन् ।

वडा नम्बर ७ मा जेब्रा चुनाव चिह्न लिएर स्वतन्त्र उम्मेद्वारी दिएका रामस्वागरथ यादवले ७२७ मत पाएका छन् । उनी १ मतान्तरले विजयी भएका हुन् । ३ जनाले मात्रै उम्मेद्वारी दिएको सो वडामा नेकपा माओवादी केन्द्रका सुरेन्द्रकुमार सिंह कोइरीले ७२६ र नेकपा एमालेका धनसिंह कपछाकी मगरले १४२ मत पाएका छन् ।

वडा नम्बर १३ मा स्वतन्त्र उम्मेद्वार लक्ष्मण सिंह ४३३ मत ल्याएर विजयी भएका छन् । ९ जनाले उम्मेद्वारी दिएको सो वडामा नेकपा एमाले दोस्रो, लोकतान्त्रिक समाजवादी पार्टी तेस्रो, एकीकृत समाजवादी चौथो, नेकपा माओवादी केन्द्र पाँचौँ स्थानमा रहेका छन् । बाँकी ४ जना उम्मेद्वारले ५० मत पनि कटाएका छैनन् । जनमत पार्टी, नेपाली कांग्रेस, जनता समाजवादी पार्टी र राष्ट्रिय प्रजातन्त्र पार्टीका उम्मेद्वार छैटौँ, सातौँ, आठौँ र नवौँ स्थानमा रहेका छन् ।

वड नम्बर १४ मा स्वतन्त्र उम्मेद्वार १ मतान्तरले विजयी भएका छन् । ५०८ मत ल्याएर विजयकुमार महतो विजयी हुँदा उनका निकटतम प्रतिष्पर्धी नेपाली कांग्रेसका भरतबहादुर हमालले ५०७ मत पाएका छन् । माओवादी केन्द्रका उमेशकुमार महतोले ३९५ र नेकपा एमालेका डाकराज पोखरेलले ३१२ मत पाएका छन् । बाँकी ३ जना उम्मेद्वारले ४० मत पनि कटाएका छैनन् ।

वडा नम्बर २, ५, ९ र १० को अध्यक्षमा स्वतन्त्र उम्मेद्वारी परेको थिएन ।

वडा नम्बर ३ मा जेब्रा चुनाव चिह्न लिएका उम्मेद्वार वडाध्यक्ष पदमा ७७ मत ल्याएर तेस्रो स्थानमा छन् । सो वडामा नेकपा एमालेका उम्मेद्वार विजयी हुँदा नेकपा माओवादी केन्द्रका उम्मेद्वार दोस्रो भएका छन् । नेपाली कांग्रेसका उम्मेद्वार स्वतन्त्रभन्दा पछि चौथो स्थानमा रहेका छन् ।
वड नम्बर ४ मा पनि जेब्रा चुनाव चिह्न लिएका स्वतन्त्र उम्मेद्वार तेस्रो स्थानमा रहेका छन् । सो वडामा नेपाली कांग्रेसका उम्मेद्वार विजयी भएका छन् भने नेकपा माओवादी केन्द्रका उम्मेद्वार दोस्रो स्थानमा रहेका छन् । मुडा चुनाव चिह्न लिएका स्वतन्त्र उम्मेद्वारले शून्य मत पाएका छन् ।
वडा नम्बर ६ मा जेब्रा चुनाव चिह्न लिएर उठेका स्वतन्त्र उम्मेद्वार तेस्रो स्थानमा रहेका छन् । नेकपा माओवादीले चुनाव जितेको सो वडामा एमाले दोस्रो स्थानमा रहेको छ । चौथो स्थानमा जनमत पार्टी छ भने ७ जनाले उम्मेद्वारी दिएको सो वडामा नेपाली कांग्रेस पाँचौँ स्थानमा पुगेको छ ।

वडा नम्बर ८ मा स्वतन्त्र उम्मेद्वार पाँचौँ स्थानमा रहेका छन् । जेब्रा चुनाव चिह्न लिएका उनी कांग्रेस उम्मेद्वारभन्दा अघि छन् । कांग्रेस सो वडाको मत परिणामअनुसार अन्तिम स्थानमा रहेको छ । नेकपा माओवादी केन्द्रले जितेको सो वडामा नेकपा एमाले दोस्रो स्थानमा छ । लोकतान्त्रिक समाजवादी पार्टी तेस्रो तथा राष्ट्रिय जनमुक्ति पार्टी चौथो स्थानमा रहेका छन् ।

वडा नम्बर ११ मा जेब्रा चुनाव चिह्न लिएर उम्मेद्वारी दिएका स्वतन्त्र उम्मेद्वार सहित ३ जनाको उम्मेद्वारी पर्दा स्वतन्त्र उम्मेद्वार तेस्रो स्थानमा भए पनि सम्मानजनक मत पाएका छन् । ८१६ मत ल्याएर नेकपा माओवादी केन्द्रका उम्मेद्वार विजयी हुँदा निकटतम प्रतिष्पर्धी नेपाली कांग्रेसका उम्मेद्वारले ७२३ मत ल्याएका छन् । अन्तिम स्थानमा रहेका स्वतन्त्र उम्मेद्वारले ६७८ मत ल्याएका छन् ।

७ जना उम्मेद्वार रहेको वडा नम्बर १२ मा जेब्रा चुनाव चिह्न लिएका स्वतन्त्र उम्मेद्वार चौथो स्थानमा रहेका छन् । यद्यपि उनले नेकपा एमालेका उम्मेद्वारको भन्दा बढी मत ल्याएका छन् । नेकपा माओवादी केन्द्रले जितेको सो वडामा नेपाली कांग्रेस दोस्रो भएको छ । जनमत पार्टी तेस्रो भएको छ भने एमाले पाँचौँ भएको छ ।

वडा नम्बर १ मा स्वतन्त्रको प्यानल विजयी
बर्दिबास नगरपालिकाको वडा नम्बर १ मा दलित महिला सदस्यबाहेक बाँकी ४ पदमा जेब्रा चुनाव चिह्न लिएर स्वतन्त्र उम्मेद्वारी दिएका विजयी भएका छन् । दलित महिला सदस्यमा भने स्वतन्त्र उम्मेद्वारी परेको थिएन । सो पदमा नेकपा एमालेकी उम्मेद्वार विजयी भएकी छिन् ।

महिला सदस्यमा स्वतन्त्र उम्मेद्वार लक्ष्मी कोइराला विजयी भएकी छिन् । खुला सदस्यमा श्यामकुमार तामाङ र हरिप्रसाद गौतम विजयी भएका छन् । स्वतन्त्र उम्मेद्वार उनीहरुले समान ७७४ मत पाएका छन् ।