विराटचोक: सुन्दरहरैंचा नगरपालिकाको वडा नम्बर १२ ले भू उपयोग नियमावलीले पार्ने असरको बारेमा जानकारी दिन र वडावासीको मत संकलन गर्न आज छलफलको आयोजना गरेको छ ।

वडा कार्यालयमा भएको छलफलका वक्ताले सबै पक्ष विचार गरेर जग्गाको वर्गीकरण गर्नुपर्ने बताए । छलफलका वक्ताले बस्ती बीचमा कृषियोग्य जमिन राख्न अप्ठ्यारो हुने हुनाले वडा नम्बर १२ मा मात्रै नभएर नगरभर नै जग्गाको वर्गीकरण गर्न समस्या हुने धारणा राखेका थिए ।
अधिकांश वक्ताले वडा नम्बर १२ लाई आवासीय क्षेत्र तोक्नुपर्ने बताएका थिए । वडाको दक्षिणी क्षेत्रको केही भूभागलाई कृषि क्षेत्र तोकेर बाँकी क्षेत्रलाई आवासीय क्षेत्र तोक्न सकिने उनीहरुको सुझाव थियो ।

स्थानीय तहले पहिले नै विज्ञको टोली बनाएर यस सम्बन्धमा काम गर्नुपर्नेमा त्यसो हुन नसकेको उनीहरुको भनाइ थियो । कृषि क्षेत्रमा राख्दा वा आवासीय क्षेत्रमा राख्दा हुने फाइदा वा बेफाइदाको बारेमा स्पष्ट भएर मात्र क्षेत्र निर्धारण गरिनुपर्ने उनीहरुले माग राखेका थिए । जग्गाको वर्गीकरणमा समस्या देखिने हुनाले बृहत छलफलको आवश्यकता उनीहरुले औँल्याएका थिए । १० कठ्ठाभन्दा बढी जग्गा हुने सबैलाई सहभागी गराएर सुझाव संकलन गर्नुपर्ने पनि उनीहरुले बताएका थिए ।

सरकारले यही जेठ २३ गते नेपाल राजपत्रमा सूचना प्रकाशित गरी भू उपयोग नियमावली २०७९ लागू गरेको छ । २० पेजमा प्रकाशित सो नियमावलीअनुसार अब जग्गाको भूउपयोग क्षेत्रको नक्सा र विवरण तयार पारी सार्वजनिक गर्नुपर्नेछ ।

राजपत्रमा प्रकाशित सूचनाको अनुसूची १ मा जनाइएअनुसार जग्गालाई अब कृषि, आवासीय, व्यावसायिक, औद्योगिक, खानी तथा खनिज र वन गरी ६ क्षेत्रमा वर्गीकरण गर्नुपर्नेछ ।

भू उपयोग नियमावली लागू भएपछि अहिले जग्गाको कित्ताकाट रोकिएको छ भने बैंकले धितो जमानत लिन छाडेका छन् । जग्गाको कित्ताकाट गर्न सो जग्गा कुन क्षेत्रमा पर्छ भनी स्थानीय तहले खुलाएर जग्गाधनीलाई सिफारिश दिनुपर्ने तर त्यस विषयमा धेरै स्थानीय तहमा छलफल नै नभएकाले जग्गाको कित्ताकाट रोकिएको हो ।

जग्गाको कित्ताकाट रोकिएपछि सुन्दरहरैंचा नगरपालिकाले जेठ २५ गते सबै वडा कार्यालयलाई पत्र लेखी असार २ गतेसम्ममा जग्गाको वर्गीकरण गरिसक्न पत्राचार गरेको थियो । तर नगर परिषद्को तयारीमा जनप्रतिनिधि लागेका हुनाले कुनै पनि वडाले जग्गाको वर्गीकरण गर्न त परै जाओस् छलफलसम्म बोलाउन सकेका छैनन् ।

नगरपालिकाको वडा नम्बर १२ ले भने पहिलो चरणको छलफल आज बोलाएको हो । वडाध्यक्ष रोशनप्रसाद ढकालका अनुसार अझै केही चरणमा छलफल भएपछि मात्रै वडाले आफ्नो वडाको जग्गाको वर्गीकरण गरी नगरपालिकालाई पठाउनेछ । सबै वडाको वर्गीकरण आइसकेपछि नगरपालिकाले माथिल्लो निकायमा त्यसको जानकारी गराउनेछ ।