विराटचोकः नझरेका फूलहरुद्वारा तीन स्रष्टा सम्मानित भएका छन् । मोरङको सुन्दरहरैंचामा शुक्रबार आयोजित कार्यक्रममा लोक गायक शम्भु राई, कविता आले र राजन राईलाई संस्थाले सम्मान गरेको हो ।

‘कलाकार राष्ट्रिका गरिमा, निधि र पहिचान हुन् भन्ने नारा बोकेको नझेरका फूलहरुको ३० औँ पलेँटी साँझमा स्रष्टाहरुलाई सम्मान गरिएको हो । कार्यक्रमका प्रमुख अतिथि प्रदेश १ सरकारका सामाजिक विकास मन्त्री राजन राई, प्रदेश सभा सदस्य लोकप्रसाद संग्रौला, नगरप्रमुख केदारप्रसाद गुरागाईले संयुक्त रुपमा सम्मान पत्र प्रदान गरेका थिए ।

कार्यक्रममा गायक शम्भु राईले राजनीतिक सामाजिक परिवर्तन गर्न सांस्कृतिक आन्दोलन गरी पञ्चायती व्यवस्थाका लागि छातीमा मुड्की हानी व्यवस्था बदल्न हिँडेको स्मरण गरे । नेताहरु त्यो समयमा भूमिगत हुँदा सांस्कृतिक कार्यक्रम लिएर देशका विभिन्न भागमा कलाकार पुगेको र अहिले गणतन्त्र र लोकतन्त्र आइसकेपछि कलाकार भूमिगत हुने र नेता खुला रुपमा हिँड्नुपर्ने अवस्था आउनु विडम्बनापूर्ण भएको उनको भनाइ थियो ।

उनले ‘आलुदम चना….., घर त हिले हो …., चिठी तिमीलाई लेखँु भन्छु….., पहाडको छोरी हिउँ जस्तै गोरी…. बोलका गीत दर्शकमाझ प्रस्तुत गरेका थिए ।

गायिका कविता आलेले पनि बसी खर काटौँ, उठी खर काटौँ…, चुरौटे दाइ…., झ्याम्मै चौतारी …. लगायत गीतले दर्शकलाई मनोरञ्जन प्रदान गरेकी थिइन् ।

यसैगरी, गायक राजन राईले तारा खसौली…., कान थापेर सुनिदेऊ…., लगायतका लोकप्रिय गीत प्रस्तुत गर्दै आफू २० वर्ष जागीरे जीवनले गर्दा साङ्गीतिक क्षेत्रबाट टाढा रहेको बताए । अहिले यस्ता संस्थाले ‘उत्खनन्’ गरेर ल्याएकोमा आफू हर्षित भएको उनले बताए ।

कार्यक्रममा बोल्दै सामाजिक विकास मन्त्री राईले कला, साहित्य, गीत सङ्गीतका क्षेत्रमा आफू पनि रहेकाले यसमा सक्दो सहयोग हुने बताए । नझरेका फूलहरुको उन्नयनका लागि पनि सहयोग गर्ने उनले बताए ।

यस्तै प्रदेश सांसद संग्रौलाले पनि कला साहित्यले जीवनलाई उत्कृष्ट बनाएको बताए ।

नगर प्रमुख गुरागाईले साहित्यका क्षेत्रका लागि नगरले बजेट छुट्याएकाले सहयोग गर्ने बताए ।

सुन्दरहरैंचा उद्योग वाणिज्य संघको सभाहलमा भएको कार्यक्रममा गायक दुर्गा पराजुली, गायिका यमुना पराजुली र भूमा अधिकारीले साङ्गीतिक मनोरञ्जन प्रदान गरेका थिए ।

कार्यक्रम सुन्दरहरैंचा कला साहित्य विकास समितिका अध्यक्ष छवि वैरागी घिमिरेको अध्यक्षतामा भएको थियो । कार्यक्रमको सञ्चालन नझरेका फूलहरुका प्रस्तोता केपी घिमिरेले गरेका थिए ।

भानु साझा पुस्तकालय सुन्दरहरैंचा सहयोगी संस्थाको रुपमा रहेको थियो ।