विराटचोकः मेची बहुउद्देश्यीय सहकारी संस्थाले आर्थिक अवस्था कमजोर भएका आफ्ना सदस्यका लागि लक्षित गरी दमक–४ मा ५७ वटा एकीकृत आवास गृह निर्माण गरेको छ । प्रदेश नं. १ कै उत्कृष्ट सहकारीका रूपमा पुरस्कृत भएको उक्त सहकारीले करिब तीन बिगाहा जमिनमा आवास गृह निर्माण गरेको जनाएको छ ।

सहकारीले सदस्यलाई विभिन्न कार्यक्रम मार्फत् सदस्यलाई व्यावसायिक बनाउन १५ शीर्षकबाट बचत संकलन, १२ शीर्षकबाट कर्जा लगानी, सहकारी बस्ती निर्माण, ग्रोसरी पसल, युवा तथा साना व्यवसायी स्वरोजगार लगायत कार्यक्रममार्फत् ल्याएको छ ।

प्रत्यक्ष तथा अप्रत्यक्ष रुपमा संस्थाले सदस्यहरुलाई प्रदान गर्दै आएको ३२ वटा सुविधामा यो वर्ष दुई वटा थप गरी ३४ वटा पुर्याएको हो ।

थप गरिएका सुविधाहरुमा यस अघि सदस्य र सदस्यको श्रीमान् वा श्रीमतीको स्वर्गारोहण हुँदा मात्र दिँदै आएको काजकिरिया खर्च यसपटकबाट सदस्यका जन्म दिने बुवा र आमाको स्वर्गारोहण हुँदा समेत काजकिरिया खर्च रु ५ हजार प्रदान गर्ने गरी सुविधा थप गरेको छ ।

संस्थाले कर्जा लिएका सदस्यको मृत्यु भएमा रु १ लाख कर्जा छुट दिँदै आएकोमा यस वर्ष रु ५० हजार थप गरी रु १ लाख ५० हजार छुट दिने जनाएको छ । यसअघि सदस्यको छोरी जन्मिँदा मात्र रु १ हजारको शेयर प्रदान गर्दै आएको संस्थाले यस वर्षबाट छोरा वा छोरी जन्मिए रु १ हजारको शेयर प्रदान गर्ने जनाएको छ ।

यस्तै, संस्थाको आर्थिक कारोबार र सेवा क्षेत्रलाई थप फराकिलो बनाउँदै लगिएको संस्थाका प्रमुख कार्यकारी अधिकृत खोमप्रसाद बगालेले शनिबार आयोजित पत्रकारसँगको अन्तरक्रियामा जानकारी दिए ।

कोरोना महामारीका कारण बजारमा उत्पन्न असहज परिस्थिति, मुलुकमा रहेको आर्थिक तरलता अभावका कारण व्यावसायिक कारोबारमा आएको कमीका बाबजुद संस्थाले गत आर्थिक वर्ष २०७८÷०७९ मा लिइएका सबै लक्ष्य भेटाउन सफल भएको वार्षिक प्रतिवेदनमा उल्लेख गरिएको छ ।

संस्थामा गत असार मसान्तसम्ममा सदस्यता लिएका १३ हजार ३ सय १८ सदस्यहरुको शेयर पूँजी ३५ करोड ५५ लाख ७८ हजार ८ सय रुपैयाँ पुगेको छ । संस्थाको जगेडा कोषमा १४ करोड ७७ लाख ५९ हजार ९ सय रुपैयाँ र अन्य कोषहरुमा ११ करोड ६३ लाख ७३ हजार रुपैयाँ गरी जम्मा कोषमा मात्र २६ करोड ४१ लाख ३३ हजार ३ सय ६९ रूपैयाँ पुगेको छ ।

गत आर्थिक वर्षमा कुल ११ करोड ९८ लाख २९ हजार रुपैयाँ नाफा कमाउन सफल भएको जनाइएको छ । अन्तरक्रियामा संस्थाले गत आर्थिक वर्षमा करिब साढे तीन अर्ब रुपैयाँ बराबरको कारोबार गर्न सफल भएको जनाउँदै चालु आर्थिक वर्ष २०७९÷ ८० लाई बचत वर्षका रुपमा मनाउने योजना सार्वजनिक गरिएको छ ।

संस्थाको सञ्चार उपसमितिले आयोजना गरेको अन्तरक्रियामा संस्थाका अध्यक्ष नारायणप्रसाद भट्टराईले संस्थाले अहिले प्रदेश १ का विभिन्न जिल्लामा रहेका १२ वटा सेवा केन्द्रमार्फत् आफ्ना सदस्यहरुसँगको कारोबारलाई निरन्तरता दिइरहेको र छिट्टै विराटचोक, रतुवामाई, माङसेबुङ र इटहरीमा समेत सेवा केन्द्र सञ्चालनमा ल्याउने तयारी भइरहेको जानकारी दिए । उनका अनुसार अहिले झापा, मोरङ र इलाममा सेवा सुचारु छ ।

संस्थाका कार्यकारी प्रमुख बगालेले संस्थाको आगामी वार्षिक साधारण सभामा पेश गरिने प्रतिवेदनको सारसहित संस्थाले लिएको नीति कार्यान्वयनको पक्षका बारेमा प्रष्ट्याएका थिए ।