विराटचोकः मोरङको मिक्लाजुङ गाउँपालिकाका केही वडामा बसाइँ सरेर जानेको संख्या बढी भए पनि केही वडामा भने बसाइँ सरेर आउनेको संख्या धेरै छ । समग्रमा सो गाउँपालिकाबाट बसाइँ सरेर जानेभन्दा बसाइँ सरेर आउनेको संख्या बढी छ ।

गाउँपालिकाको पञ्जीकरण शाखाका अनुसार आर्थिक वर्ष ०७६\०७७ मा सो गाउँपालिकामा १६६ जना बसाइँ सरेर आउँदा २०६ जना भने पालिकाबाट बसाइँ सरेर अन्यत्र गएका छन् । ६० परिवार बसाइँ सरेर आएका हुन् भने ६५ परिवार बसाइँ सरेर गएका हुन् । पछिल्ला २ वर्षमा भने बसाइँ आउनेको संख्या बढी छ ।

सबैभन्दा धेरै वडा नम्बर ७ बाट १२ परिवारका ३६ जना बसाइँ सरेर गएका छन् । वडा नम्बर ४ बाट एउटा परिवारका २ जना बसाइँ सरेर गएका छन् ।

उता, सबैभन्दा धेरै वडा नम्बर ६ मा २१ परिवारका ६२ जना बसाइँ सरेर आएका छन् भने सबैभन्दा कम वडा नम्बर १ मा एउटा परिवारका २ जना बसाइँ सरेर आएका छन् । वडा नम्बर ४ मा भने सो वर्ष कुनै पनि परिवार बसाइँ सरेर नआएको पालिकाको तथ्याङ्कले देखाउँछ ।

आर्थिक वर्ष २०७७\०७८ मा सो गाउँपालिकामा ७८३ जना बसाइँ सरेर आएका छन् भने ४८७ जनामात्रै बसाइँ सरेर गएका छन् । २८० परिवार बसाइँ सरेर आउँदा १५१ परिवार बसाइँ सरेर पालिकाबाट बाहिरिएका छन् ।

पञ्जीकरण शाखाका अनुसार सो आर्थिक वर्षमा सबैभन्दा कम वडा नम्बर ५ बाट ८ परिवारका २३ जना बसाइँ सरेर गएका छन् । सबैभन्दा धेरै वडा नम्बर ३ बाट २७ परिवारका ९६ जना बसाइँ सरेर गएका छन् ।

सबैभन्दा कम वडा नम्बर ५ मा १ परिवारका १ जना बसाइँ सरेर आएका छन् । सबैभन्दा धेरै वडा नम्बर ६ मा ८० परिवारका २३८ जना बसाइँ सरेर आएका छन् ।

गत आर्थिक वर्ष २०७८\०७९ मा ३४० परिवारका १०३२ जना बसाइँ सरेर आएका छन् । त्यस्तै, ३०९ परिवारका ९४५ जना बसाइँ सरेर गएका छन् ।

गाउँपालिकाको पञ्जीकरण शाखाका अनुसार बसाइँ सरेर सबैभन्दा धेरै वडा नम्बर ६ मा ६६ परिवारका २११ जना आएका छन् । सबैभन्दा कम बसाइँ सरेर वडा नम्बर १ मा आएका छन् । सो वडामा ७ परिवारका १४ जना बसाइँ सरेर आएका छन् ।

त्यस्तै, वडा नम्बर ५ बाट सबैभन्दा कम १२ परिवारका ४४ जना बसाइँ सरेर गएका छन् । वडा नम्बर ७ बाट सबैभन्दा धेरै ४५ परिवारका १ सय ४३ जना बसाइँ सरेर गएका छन् । वडा नम्बर ६ बाट ४६ परिवारका १ सय ३९ जना र वडा नम्बर १ बाट ४३ परिवारका १३६ जना बसाइँ सरेर गएका छन् ।

सुन्दरहरैंचाको वडा नम्बर १० मा बसाइँ सरी आउनेको आकर्षण, यस्तो छ तीन आर्थिक वर्षको तथ्याङ्क