दमकः अनलाइनमार्फत् नेपालमा प्रतिबन्धित एप्लिकेसनद्वारा पैसाको हारजीत हुने गरी खेल खेल्ने र सो खेल खेलाउने दमकको एक कल्सल्टेन्सी सञ्चालक सहित ४ जनालाई प्रहरीले पक्राउ गरेको छ ।

पक्राउ पर्नेहरुमा दमक–८ मा रहेको पद्मा इन्टरनेशनल कन्सल्टेन्सीका सञ्चालक २५ वर्षीय सतप्रकाश साह र दमक–७ का २७ वर्षीय राजु श्रेष्ठ रहेका छन् । त्यस्तै, योर्स कम्युनिकेसन एण्ड फोटो स्टुडियोका सञ्चालक झापाको कमल गाउँपालिका–२ का ३० वर्षीय अरुण कार्की तथा ब्रिटिस आर्मी ट्रेनिङ सेन्टर दमकका सञ्चालक दमक–८ का ३३ वर्षीय राजु लिम्बू रहेका छन् ।

गोप्य सूचनाको आधारमा १ नं. प्रदेश प्रहरी कार्यालय विराटनगरको आरआईटी समूह, जिल्ला प्रहरी कार्यालय झापा र इलाका प्रहरी कार्यालय दमकबाट संयुक्त रुपमा खटिएको प्रहरी टोलीले उनीहरुलाई भदौ ३ गते दमकबाट पक्राउ गरेको थियो । उनीहरुलाई आज पत्रकार सम्मेलन मार्फत् सार्वजनिक गरिएको हो ।

पक्राउ परेको यो समूहले दमक नगरपालिका तथा आसपासका क्षेत्रमा अनधिकृत रुपमा अनलाइन गेमिङमार्फत् नेपालमा प्रतिबन्धित वान एक्स बेट एप्लिकेसनद्वारा पैसाको हारजीत हुने गरी खेल खेल्ने र सो खेल खेलाउने गरेका थिए । उनीहरुले अनधिकृत रुपमा अन्य व्यक्तिहरुको नागरिकताबाट एन सेलको सिम झिकेर सोही सिमबाट सट्टेबाजीको लागि आवश्यक पर्ने रकम प्राप्त गर्न आवश्यक पर्ने इ सेवा खाता खोली लाखौंको कारोबार गर्ने गरेका थिए ।

कन्सल्टेन्सीमा आउने विद्यार्थीहरुको प्रयोगको लागि विभिन्न सरकारी कार्यालयको छाप तथा जनप्रतिनिधिहरुको छाप प्रयोग गरी सरकारी कार्यालयको नक्कली पत्र र एसईईको प्राप्ताङ्क समेत परिवर्तन गर्ने गरेको अनुसन्धानको क्रममा खुल्न आएको इलाका प्रहरी कार्यालय दमकले जनाएको छ ।

पक्राउ परेका उनीहरुको साथबाट प्रयोगमा ल्याईएका एन सेलका सिमहरु २ सय ७९ थान र प्रयोग नभएका ४५ थानका साथै १९ थान मोबाइल र ४ वटा ल्यापटप ४ बरामद गरेको छ । अंग्रेजीमा प्रजापति सापकोटा वार्ड चेयरमेन दमक–२ लेखिएको एउटा छाप, हेड टिचर लेखिएको तथा डिकबहादुर गुरुङ लेखिएको छाप पनि बरामद गरेको प्रहरीले जनाएको छ ।

मादी म्युनिसिपिलिटी ३ नम्बर वार्ड अफिस संखुवासभा, गभर्मेन्ट अफ नेपाल मिनिस्ट्री अफ एजुकेसन, ग्लोबल एजुकेसन एकेडेमी, नेप्लिज आर्मी रेकर्ड अफिस २०४३ लेखिएका छाप पनि बरामद भएको प्रहरीले जनाएको छ । सबै छाप अङ्ग्रेजी भाषामा तयार पारिएका छन् ।

त्यति मात्रै होइन नेपालको निशान छाप भएको स्ट्याम्प १ थान र नेपाली भाषामा नेपाल सरकार राष्ट्रिय परीक्षा बोर्ड लेखिएको स्ट्याम्प १ थान पनि बरामद भएको प्रहरीले जनाएको छ।

पक्राउ परेको सो समूहलाई मुलुकी अपराध संहिता २०७४ को परिच्छेद ५ को सार्वजनिक हित, स्वास्थ्य, सुरक्षा, सुविधा र नैतिकता विरुद्धका कसुर तथा लिखत सम्बन्धित कसुरमा जिल्ला प्रशासन कार्यालय झापा र जिल्ला अदालत झापाबाट म्याद थप गरी थप अनुसन्धान भइरहेको ईलाका प्रहरी कार्यालय दमकले जनाएको छ ।