काठमाडौंः मोरङका बोधित डिसी र नेपाल आर्मीकी सुस्मिता खड्काले कल्याण पाण्डे राष्ट्रिय जुनियर तथा क्याडेट टेबलटेनिस प्रतियोगितामा स्वर्ण जितेका छन् । जुनियर सिंगल्सको ब्वाइजमा बोधित तथा गर्ल्समा सुस्मिताले स्वर्ण जितेका हुन् ।

लैनचौरस्थित राष्ट्रिय टेबलटेनिस प्रशिक्षण केन्द्रमा आइतबार भएको ब्वाइज फाइनलमा बोधितले एभीएमका रुविन महर्जनलाई १२–१०, १३–११ र ११–५ को सोझो सेटमा पराजित गरे । नुवाकोटका गनञ्जय दाहाल र काठमाडौंका हिमाल बिष्ट तेस्रो भए ।

गर्ल्सको उपाधि भीडन्तमा सुस्मिताले एभीएमकी वियाङ्का राईलाई ११–९, ११–८ र १३–११ को सिधा सेटमा हराइन् । प्रभातकी अन्जु सुवाल र कान्तिपुर पिङपोङ क्लबकी प्रणिका कुँवर तेस्रो भए । शीर्ष तीन स्थानमा रहनेले क्रमशः १० हजार, ५ हजार र २ हजार ५ सय नगद पुरस्कार पाए ।

अखिल नेपाल टेबलटेनिस संघद्वारा आयोजित प्रतियोगिताको क्याडेट गर्ल्स सिंगल्समा एभीएमकी इभाना थापा मगर पहिलो भइन् । इभानाले फाइनलमा मोर्डन कलेजकी दिया देउलालाई ११–४, १२–१० र ११–४ को सोझो सेटमा पाखा लगाइन् । नेपाल प्रहरीकी शुभश्री श्रेष्ठ र प्रोक्सिमाकी नर्वदा खाइतु तेस्रो भए । विजेताले ७ हजार ५ सय, उपविजेताले ३ हजार ५ सय र तेस्रो हुनेले २ हजार रुपैयाँ नगद पुरस्कार पाए ।

विजेतालाई राष्ट्रिय खेलकुद परिषद्का सदस्य–सचिव टंकलाल घिसिङ, आयोजक संघका अध्यक्ष चतुरानन्दराज वैद्य, प्रथम उपाध्यक्ष धर्ममान बज्राचार्यलगायतले एक कार्यक्रमबीच पुरस्कृत गरे ।