विराटचोकः मंसिर ४ गते हुने प्रतिनिधिसभा र प्रदेशसभा निर्वाचनमा ५ जना अर्थमन्त्री प्रत्यक्षबाट र २ जना समानुपातिकबाट चुनावी मैदानमा होमिएका छन् । डा. बाबुराम भट्टराईलगायतका केही अर्थमन्त्रीले स्वेच्छाले चुनावी मैदान छाडेका छन भने केहीले टिकट पाएनन् ।

बहालवाला अर्थमन्त्री जनार्दन शर्माले रुकुम पश्चिमबाट उम्मेद्वारी दिएका छन् । नेकपा माओवादीको तर्फबाट शेरबहादुर नेतृत्वको कांग्रेस, माओवादी र समाजवादी गठबन्धनमा अर्थमन्त्री रहेका उनी यसअघि प्रचण्ड प्रधानमन्त्री हुँदा ऊर्जामन्त्री बनेका थिए । उनको प्रतिष्पर्धा एमालेका नन्दराम देवकोटासँग हुने भएको छ ।

केपी शर्मा ओली प्रधानमन्त्री हुँदा अर्थमन्त्री रहेका विष्णु पौडेलले रुपन्देही २ बाट उम्मेद्वारी दिएका छन् । विष्णु पौडेल अर्थमन्त्री हुँदा नेप्सेको अघिल्लो उच्च बिन्दु १८८१ छोएको थियो । उनी अर्थमन्त्री हुँदा नै दुई पटक नेप्सेले उच्च बिन्दु हासिल गरेकाले शेयर बजार मैत्री अर्थमन्त्रीको रुपमा उनी शेयर लगानीकर्ता माझ परिचित छन् । पौडेलको प्रतिस्पर्धा एमालेबाटै फुटेर बनेको नेकपा समाजवादीका उम्मेद्वार राजु गुरुङसँग रहेको थियो । तर, चेक बाउन्स मुद्दाका कारण कालो सूचीमा परेका कारण उनको उम्मेद्वारी निर्वाचन आयोगले खारेज गरेपछि पौडेललाई चुनाव जित्न सहज भएको छ ।

प्रचण्ड प्रधानमन्त्री हुँदा अर्थमन्त्री बनेको वर्षमान पुन यसपटक पनि माओवादीको जनाधार बलियो भएको रोल्पाबाट चुनावी मैदानमा होमिएका छन् । उनको प्रतिष्पर्धा नेकपा एमालेका पूर्णबहादुर बुढा मगरसँग हुने भएको छ ।

नेकपा एमालेमा सरकारमा सहभागी रहँदा अर्थमन्त्री रहेका सुरेन्द्र पाण्डे चितवन १ बाट चुनावी प्रतिस्पर्धा गर्दैछन् । उनको प्रतिस्पर्धीमा नेपाली कांग्रेसको तर्फबाट अर्थशास्त्री विश्व पौडेलले प्रतिष्पर्धा गर्दैछन् । पौडेल राष्ट्रिय योजना आयोगको उपाध्यक्ष पदबाट राजीनामा दिएर चुनावी मैदानमा ओर्लिएका छन् ।

त्यसैगरी पूर्व अर्थमन्त्री ज्ञानेन्द्रबहादुर कार्कीले सुनसरी ४ बाट चुनाव लड्दैछन् । उनी हाल सञ्चार तथा सूचना प्रविधि मन्त्री छन् । उनले नेकपा एमालेका जगदीश कुसियतसँग प्रतिस्पर्धा गर्दैछन् ।

राप्रपाका पूर्व अध्यक्षद्वय डा. प्रकाशचन्द्र लोहनी र पशुपतिशमशेर राणालाई उक्त पार्टीले समानुपातिक समूहको सूचीमा समावेश गरेको छ । दुवै जना विभिन्न समयमा अर्थमन्त्रीको रुपमा रहेका थिए ।

गिरिजाप्रसाद कोइारालाको मन्त्रिमण्डलमा प्रायः अर्थमन्त्रीको रुपमा रहने डा.रामशरण महतले यसपटक उम्मेद्वारको टिकट पाएनन् । २०७४ को चुनावमा उनी पराजित भएका थिए ।

२०४६ को राजनीतिक परिवर्तन पछि पहिलो अर्थमन्त्री बनेका महेश आचार्य मोरङ ४ बाट उम्मेद्वार सिफारिश भएर पनि टिकट पाएनन् । गठबन्धनका कारण कांग्रेसले सो क्षेत्र माओवादीलाई छोडेपछि उनी उम्मेद्वार हुन नपाएका हुन् ।

माओवादी सरकारका अर्थमन्त्री डा. बाबुराम भट्टराईले आफ्नो क्षेत्र माओवादीका अध्यक्ष प्रचण्डलाई छोडेर आफू चुनावमा भाग नलिने भएका छन् ।

माओवादी सरकारका अर्थमन्त्री तथा सभामुख कृष्णबहादुर महरा पनि स्वेच्छाले उम्मेद्वार नहुने भएका छन् ।

केपी ओलीका प्रिय पात्र एवम् पूर्व गभर्नर समेत रहेका अर्थमन्त्री डा. युवराज खतिवडा प्रत्यक्ष र समानुपातिक कतै पनि उम्मेद्वार भएनन् ।