मंसिर ४ मा हुन प्रतिनिधि सभा र प्रदेश सभा सदस्य निर्वाचनको लागि तेह्रथुम जिल्ला प्रदेश क्षेत्र नम्बर (क) बाट प्रदेश सभा सदस्य पदका उम्मेद्वार किशोरचन्द्र दुलाल रहेका छन् । उनीसँग गरेको कुराकानी प्रस्तुत गरेका छौँ ।

चुनावको तयारी कसरी गर्दै हुनुहुन्छ ?

हामी दैनिक जनताको घरआँगनमा पुगेर आफ्ना एजेन्डा प्रस्तुत गरिरहेका छौँ । मतदाताहरु नेकपा एमाले र सूर्य चिह्नका उम्मेदवारप्रति सकारात्पक देखिएका छन् । अभियान जारी छ ।

यहाँको निर्वाचन क्षेत्र र समग्र जिल्लालाई समृद्ध बनाउने योजना के–के छन् ?

यो जिल्लालाई शान्ति, समृद्धि र समानताका आधारमा अघि बढाउने योजना छ । विकासको महत्वपूर्ण क्षेत्र पर्यटन भएकाले यसको विकास र विस्तारमा लाग्ने छु । तीनजुरे, मिल्के जलजले क्षेत्रको विकास गर्दै जाने र यस्ता क्षेत्रमा स्थानीय सरकारसँग समन्वय गरेर काम गर्ने प्रतिबद्धता जाहेर गरेको छु । योसँंगै विकास निर्माणमा हरेक पालिकाका वडासम्म जाने सडकलाई विस्तार गर्नेछु । यदि मतदाताले विजयी बनाउनुभयो भने यो कामलाई प्राथमिकता दिने छु ।

जताततै भ्रष्टाचारको विषयले प्रवेश पाएको छ । बहस हुने गरेको छ । तैपनि यो घटेको छैन यहाँले यो विषयमा के गर्नुहुन्छ के छन् योजना ?

हो, अहिले देशमा व्याप्त समस्याको रुपमा भ्रष्टाचार रहेको छ । यसका लागि मेरो एउटा नारा पनि छ र मेरो अर्जुनदृष्टि भनेको घुसखोरी र भ्रष्टाचारको खबरदारी, सुशासन र पारदर्शिताका लागि मेरो उम्मेद्वारी हो ।

म भ्रष्टाचार गर्दिनँ र गर्न दिन्नँ । समाजमा सुशासन र पारदर्शिता ल्याउन मेरो महत्वपूर्ण भूमिका रहन्छ । जिविसमा प्रमुख हुँदा मैले गरेका कामले यो विषयमा प्रमाणित नै भएको छ ।

तपाईँलाई नै किन भोट दिने ? तपाईँको मुख्य पाँच प्राथमिकता के के हुन् ?

अहिलेको परम्परा के रहेको छ भने जब चुनाव आउँछ तब देखा पर्ने र जनतालाई भ्रममा पार्ने अनि झुटको खेती गर्ने अवस्थाबाट राजनीति गुज्रेको छ । म अरु जस्तो अवसरवादी होइन ४० वर्षदेखि जिल्ला भन्दा माथिका कमिटीमा बसेर आम नागरिकका पक्षमा काम गरेको र तत्कालीन जिविस प्रमुख हँुदा गरेका कामका आधारमा एउटा निष्ठावान व्यक्तिलाई मतदाताले निर्वाचित गराएर पठाउने छन् भन्नेमा आशावादी छु । विकासको पक्षमा सधैँ उभिने भएकाले पनि भोट दिने छन् ।

सबैभन्दा पहिला यो मुलुकको दुर्गति हुन नदिनका लागि प्रतिबद्ध छु । हामीले ल्याएको संविधानको रक्षासँगै समाजवादको बाटोतर्फ जानका लागि आर्थिक विकासको लक्ष्य प्राप्ति गर्न ‘समृद्ध नेपाल, सुखि नेपाली’ अभियानलाई अघि बढाउने छु ।

आफूले जीत हासिल गर्ने आधारहरू चाहिँ के के देख्नुभएको छ ?

यो जिल्ला भनेको नेकपा एमालले जित्दै आएको क्षेत्र हो । नागरिकको जनजिब्रोको बोलीलाई हेर्दा यो लालकिल्ला पनि हो । यस अघि भएका निर्वाचनमा जित्दै आएकाले मेरो भनौँ या सूर्य चिह्नको जीत प्रायः निश्चित छ । हाम्रो जनसंगठन पनि राम्रो छ । यहाँका जनताको अपेक्षा अनि एमालेप्रति देखिएको जनलहरले जित्ने आधारहरु देखिएको छ । काम गरेका आधारले पनि मेरो जीत निश्चित छ ।

जनतामा जाँदा के कस्ता प्रतिक्रिया पाउनुभएको छ ?

आज पनि नागरिकहरुले विकास निर्माणलाई नियालिरहेको पाएको छु । शिक्षा र स्वास्थ्यका क्षेत्रमा आवाज उठाउने गरेका छन् । शिक्षाको गुणस्तर खस्किएको अवस्था भएकाले नागरिकमा यो चुनाव पछि बन्ने सरकारले केही गर्ला भन्ने विषयमा आशावादी भएको पाएको छु । शिक्षालयको भौतिक पूर्वाधारतर्फ व्याप्त समस्या छ । यो निर्माण गर्नतर्फ प्रतिबद्ध छु । व्यावसायिक शिक्षा स्थापना गर्न लागिपर्ने छु । स्वास्थ्य क्षेत्रमा पनि समस्या छ । यस विषयमा पनि लाग्ने छु । दलित उत्पीडितका क्षेत्रमा नीति निर्माणमा समेत मेरो प्रतिबद्धता रहनेछ र लाग्नेछु ।

नयाँ मतदाता वा युवा शक्तिले चाहिँ के खोजेका छन् ?
देश परिवर्तन गर्न मुख्य भूमिका युवाको रहँदै आएको छ । उनीहरुलाई सीपमूलक तालिम, श्रममा आधारित योजना ल्याएर व्यावसायिक बनाउनुपर्नेतर्फ ध्यानाकर्षण भएको छ । युवालाई सीपयुक्त बनाउन सीप प्रबलीकरण बनाउन लाग्ने छु । हरेक वडामा खेल मैदान बनाउन लाग्ने छु ।

सडक विस्तारका क्षेत्रमा कस्ता योजना बनाउनु भएको छ ?
मेरो लक्ष्य र योजना भनेको समृद्ध तेह्रथुम निर्माण गर्ने नै हो । हरेक पालिका देखि वडासम्म जाने सडकलाई स्तरोन्नति गर्ने र सडक नभएको ठाउँमा सडक बनाउने पहिलो प्रथमिकतामा राखेको छु । विभिन्न पालिकामा चक्रपथ निर्माण गर्न लाग्ने छु । अहिलेको सरकारले रोकेका विकास निर्माणका कार्यलाई अघि बढाउनेछु ।
खाने पानी सुख्खा ग्रस्त क्षेत्रमा लिफ्टिङ गर्नेतर्फ लाग्ने छु ।

कृषिमा लाग्ने धेरै परिवार छन् । साँझबिहान काम गर्दा पनि जीवन धान्न मुस्किल छ । दिनदिनै महङ्गीले सताएको छ कृषि क्षेत्रमा कस्ता योजना बनाउनुभएको छ ?
महङ्गीले हामीलाई पनि सताएकै हो । पछिल्लो सरकार परिवर्तन भएपछि यो अझ बढेर गएको छ । हामीले यो जिल्लामा कृषिलाई निर्वाहमुखी बनाउन मात्रै सीमित भएकाले यसलाई व्यावसायिक र आधुनिकीकरणसँंगै बजारीकरण बनाउन लाग्ने छु । महिलालक्षित सीप विकासका कार्यक्रम ल्याउने छु । यसमा संघ, प्रदेश र स्थानीय तहको समन्वयमा कामहरु गर्ने छु ।

प्रचुर सम्भावना भए पनि पर्यटन क्षेत्रको विकास किन नभएको हो ?
विकासको महत्वपूर्ण क्षेत्र भनेको पर्यटन हो । हाम्रो जिल्लाको तीनजुरे, मिल्के, जलजले क्षेत्रसम्म जाने सडकको स्तरोन्नति नहुँदा पर्यटकलाई त्यहाँसम्म पुग्न समस्या छ । यदि यहाँले निर्वाचित गरेमा म यसलाई प्राथमिकतामा राखेर विकास गर्दै जाने र यस्ता क्षेत्रमा स्थानीय सरकारसँग समन्वय गरेर लाग्ने छु । समाजमा रहेका सांस्कृतिक धरोहरलाई संरक्षण गर्ने र निर्माण गर्ने क्षेत्रमा समेत मेरो ध्यान जाने छ । विकास निर्माणसंगै सरसफाई, वातावरण संरक्षण गर्ने र हरेक पालिकाको केन्द्रमा ल्याण्डफिल्ड साइट निर्माण गर्ने कुरामा लाग्ने र यसमा समन्वयकारी भूमिका खेल्ने छु । अव्यवस्थित बसोबासी तथा सुकुम्बासी समस्या हटाउन पहल गर्नेछु ।