बेलबारीः गठबन्धनका उम्मेद्वारलाई जिताएर दुवै जनालाई मन्त्री भएको देख्ने इच्छा नेकपा माओवादी केन्द्रको रहेको माओवादीका एक नेताले बताएका छन् ।
बेलबारीको वडा नम्बर ४ मा चुनावी र्यालीपछि आयोजित कोणसभालाई सम्बोधन गर्दै नेकपा माओवादी केन्द्रका बेलबारी नगर इन्चार्ज तथा प्रदेश कमिटी सदस्य तिलकप्रसाद राईले यस्तो बताएका हुन् ।
‘नेकपा माओवादी केन्द्र डा. सुनिल शर्मालाई पर्यटनमन्त्रीको रुपमा देख्न चाहन्छ । पर्यटकीय नगरी बेलबारीका बासिन्दा शर्मा पर्यटनमन्त्री भएमा बेलबारीले पर्यटनको क्षेत्रमा फड्को मार्ने छ’ गठबन्धनका तर्फबाट प्रदेश सभामा उम्मेद्वारी दिएका लक्ष्मीकुमार श्रेष्ठतर्फ इङ्गित गर्दै राईले भने, ‘केन्द्रमा शर्मा पर्यटन मन्त्री र प्रदेशमा श्रेष्ठ शिक्षा तथा स्वास्थ्य मन्त्री भएमा हाम्रो क्षेत्रको शिक्षा, स्वास्थ्य र पर्यटनमा विकास हुने छ ।’
यस क्षेत्रमा माओवादीका उम्मेद्वार नभए पनि माओवादीले प्रत्यक्षतर्फ गठबन्धनका उम्मेद्वारलाई मत दिने बताए । लोकतन्त्रलाई बचाउन लोकतान्त्रिक गठबन्धनको नीतिअनुरुप उम्मेद्वारी दिँदा क्षेत्र नम्बर ३ मा नेकपा माओवादीको भागमा प्रत्यक्षतर्फ उम्मेद्वार नपरेकाले गठबन्धनको नीतिअनुरुप नै माओवादीले त्यसलाई सहर्ष स्वीकारेको बताए ।
प्रधानमन्त्री भएपछि ओलीको बानी सुध्रिने अपेक्षा गरिए पनि झन् बिग्रिएको र संसद भङ्गसमेत गरेको विगतलाई हेरेर एमालेलाई पाठ सिकाउन गठबन्धन भएको राईले बताए । गठबन्धनका विरुद्ध उम्मेद्वारी दिनेले यो सत्यलाई बुझ्नुपर्ने उनको भनाइ थियो ।
You must be logged in to post a comment Login