विराटचोकः कादम्बिनी कृषि सहकारी संस्था सुन्दरहरैंचा ७ मा नयाँ नेतृत्व चयन भएको छ । शनिबार भएको संस्थाको १० औँ साधारणसभाले कपिल दाहालको अध्यक्षतामा नयाँ कार्यसमिति सर्वसम्मत चयन गरेको हो ।

निर्वाचन समितिका सदस्य इन्द्रकुमार राईका अनुसार संस्थाको कार्यसञ्चालन समितिका लागि दिइएको निर्धारित समयमा निर्वाचन गराउनुपर्ने गरी उम्मेद्वारी नपरेपछि सबै पदाधिकारी निर्विरोध निर्वाचित भएका हुन् ।

राईका अनुसार कार्यसमितिको अध्यक्षमा कपिल दाहाल (कमल) चयन भएका छन् । उपाध्यक्षमा शर्मिला आचार्य, सचिवमा मिलन लुइँटेल र कोषाध्यक्षमा अम्बिका अधिकारी (सिटौला) चयन भएका हुन् । सदस्यहरुमा रुपा सापकोटा, तारा दाहाल, मातृका चौलागाईँ, हरि आचार्य र जीतकुमारी पहाडी चयन भएका छन् ।

लेखा समिति संयोजकमा खेमचन्द्र अधिकारी र सदस्यहरुमा पर्शुराम आचार्य तथा राजेन्द्र पोखरेल चयन भएका छन् ।

सचिव लुइँटेल र सदस्य दाहाल मात्रै पुरानै कार्यसमितिका पदाधिकारी चयन भएका हुन् ।

साधारणसभाको उद्घाटन सुन्दरहरैंचा नगरपालिकाका नगरप्रमुख केदारप्रसाद गुरागाईँले फूलका बिरुवा रोपेर गरेका थिए । सहकारीका सात सिद्धान्तमध्ये पाँचौँ सिद्धान्त शिक्षा, तालीम र सूचनाको सिद्धान्तअनुसार अघि बढ्ने सहकारी सधैँ सफल हुने उनले बताए । गँड्यौले मल र प्राङ्गारिक मल उत्पादनमा शेयर सदस्यलाई संस्थाले अग्रसर गराउनुपर्ने उनको भनाइ थियो ।

विशिष्ट अतिथि सुन्दरहरैंचा नगरपालिका वडा नम्बर ७ का वडाध्यक्ष भुवन सिंह मगरले सहकारीमा रासायनिक मल नआउँदा वा कम आउँदा वडासम्म गुनासो आउने गरेको तर त्यसमा आफूले केही गर्न नसक्ने बताए । राज्यले नै पर्याप्त मात्रामा मल ल्याउन नसकेकाले सो समस्या देशभरका किसानको साझा समस्या भएको बताए । प्राङ्गारिक मल उत्पादन र प्रयोगमा शेयर सदस्य तथा संस्थाले ध्यान दिनुपर्ने उनले जनाए ।

कार्यक्रममा संस्थाको वार्षिक प्रतिवेदन संस्थाका अध्यक्ष मनोज दाहालले र लेखा समितिको प्रतिवेदन लेखा संयोजक निराजन धमलाले गरेका थिए ।

कार्यक्रममा शेयर सदस्यका परिवारका ज्येष्ठ सदस्य तथा उत्कृष्ट किसानलाई सम्मान तथा पुरस्कृत गरिएको थियो ।

संस्थका अध्यक्ष मनोज दाहालको अध्यक्षतामा भएको कार्यक्रमको सञ्चालन सचिव मिलन लुइँटेलले गरेका थिए । संस्थाकी उपाध्यक्ष सरस्वती दाहालले स्वागत मन्तव्य राखेकी थिइन् ।