इटहरीः इटहरीमा बसोबास गर्ने लाभग्राहीमध्ये केही लाभग्राहीले दोहोरो सुविधा लिएको पाइएको हुनाले त्यस्तो सुविधाबापत लिएको रकम सम्बन्धित वडामार्फत् फिर्ता गर्न इटहरी उपमहानगरपालिकाले १५ दिने सूचना प्रकाशन गरेको छ ।

फागुन १५ गते प्रमुख प्रशासकीय अधिकृत रामचरित्र मेहताको हस्ताक्षरमा प्रकाशित सूचनामा नेपाल सरकारबाट नियमित रुपमा पेन्सन वा अन्य सुविधा लिइरहेका केही लाभग्राहीले सामाजिक सुरक्षा भत्ता लिइरहेको पाइएको हुनाले यसअघि लिएको त्यस्तो रकम फिर्ता गर्न अनुरोध गरिएको छ ।

दोहोरो सुविधाबापत लिएको रकम फिर्ता नगरेमा त्यस्तो रकम सामाजिक सुरक्षा ऐन, २०७५ को दफा २१ को उपदफा (२) तथा सामाजिक सुरक्षा भत्ता वितरण कार्यविधि, २०७७ को दफा ३३ को उपदफा (३) बमोजिम असुलउपर गरी बिगो बराबर जरिवानासमेत हुने बताइएको छ ।

यस्तो छ सूचनाको व्यहोराः

प्रस्तुत विषयमा नेपालको संविधानबमोजिम आर्थिक रुपले विपन्न, अशक्त र असहाय अवस्थामा रहेका, असहाय एकल महिला, अपाङ्गता भएका, बालबालिका, आफ्नो हेरचाह आफैँ गर्न नसक्ने तथा लोपोन्मुख जातिका नागरिकको सामाजिक सुरक्षाको अधिकार सुनिश्चित गर्नका लागि सामाजिक सुरक्षा भत्ता विभिन्न ऐन, नियमावली तथा कार्यविधिहरु तयार गरी सोहीअनुसार बैंक तथा वित्तीय संस्थामार्फत् सम्बन्धित लाभग्राहीको नाममा खाता खोली उक्त खाताको माध्यमबाट भत्ता रकम वितरण गरिँदै आएको व्यहोरा सर्वविदितै छ ।

यस इटहरी उपमहानगरपालिकामा बसोबास गर्ने नेपाल सरकारबाट नियमित रूपमा पेन्सन वा अन्य सुविधा लिइरहेका केही लाभग्राहीहरुले सामाजिक सुरक्षा भत्ता पाउनका लागि निवेदन पेश गरेको र सामाजिक सुरक्षा भत्तासमेत बुझ्दै आएको भन्ने गुनासो प्राप्त भएको हुँदा सामाजिक सुरक्षा ऐन, २०७५ को दफा १५ बमोजिम, सरकारी कोषबाट नियमित तलब, भत्ता तथा निवृत्तभरण सुविधा पाइरहेको व्यक्तिले सामाजिक सुरक्षा भत्ता नपाउने स्पष्ट व्यवस्था भएको हुँदा यदि कसैको दोहोरो सुविधा हुनेगरी सामाजिक सुरक्षा भत्ता लिने लाभग्राहीको सूचीमा नाम दर्ता वा नवीकरण गरेको भए यो सूचना प्रकाशन भएको मितिले १५ दिनभित्र आफ्नो सम्बन्धित वडामा उपस्थित भई सामाजिक सुरक्षा भत्ता बापत बुझेको रकम फिर्ता गर्नु÷गराउनु हुन सम्बन्धित सबैमा सूचित गरिन्छ । अन्यथा ऐनको दफा २१ को उपदफा (२) तथा सामाजिक सुरक्षा भत्ता वितरण कार्यविधि, २०७७ को दफा ३३ को उपदफा (३) बमोजिम भुक्तानी लिएको रकम असुलउपर गरी बिगो बराबर जरिवानासमेत हुने भएकाले तोकिएको मितिभित्र रकम फिर्ता गर्नु÷गराउनु हुन सम्बन्धित सबैमा यो सूचना प्रकाशित गरिएको छ ।