विराटचोकः आज जेठ ११ गतेदेखि युनिक नेपाल लघुवित्तले थप सार्वजनिक निष्कासन (एफपीओ) जारी गरेको छ । लघुवित्तले ३ करोड ७९ लाख ४२ हजार ५ सय रुपैयाँ बराबरको एफपीओ जारी गर्न लागेको हो । कम्पनीले अंकित मूल्यमा नै ३ लाख ७९ हजार ४२५ कित्ता एफपीओ निष्कासन गरेको हो ।
हाल दोस्रो बजारमा १ हजार ३०० रुपैयाँभन्दा बढी मूल्य रहेको युनिक नेपाल लघुवित्तको एफपीओमा लगानीकर्ताले न्यूनतम १० कित्तादेखि अधिकतम १ हजार कित्ताका लागि आवेदन दिन सक्नेछन् । जेठ १६ गतेसम्म आवेदन दिन पाइने सो कम्पनीको एफपिओ सो अवधिमा सबै बिक्री नभएमा जेठ २५ गतेसम्म आवेदन दिन सकिने शेयर निष्कासन तथा बिक्री प्रबन्धक मुक्तिनाथ क्यापिटल लिमिटेडले जनाएको छ ।
लगानीकर्ताले सी–आस्वा प्राप्त बैंक तथा वित्तीय संस्था तथा मेरो सेयरमार्फत आवेदन दिन सक्नेछन् ।
लघुवित्तको रजिष्टर्ड कार्यालय बाँके जिल्ला, कोहलपुर नगरपालिका वडा नं. ११ मा रहेको छ । युनिक लघुवित्त २०७५ साउन १८ गते कम्पनी रजिष्ट्रारको कार्यालयमा पब्लिक लिमिटेड कम्पनीको रुपमा दर्ता भएको हो । यसले २०७५ कात्तिक २५ गते वित्तीय संस्थाको रूपमा वित्तीय कारोबार गर्न नेपाल राष्ट्र बैंकबाट इजाजत पाएको थियो भने औपचारिक रुपमा २०७५ माघ १ गतेदेखि कारोबार शुरु गरेको थियो । साविकको युनिक नेपाल लघुवित्त र घोडीघोडा लघुवित्त मर्जर भई युनिक लघुवित्तको नामबाट २०७८ पुस ३० गते एकीकृत कारोबार शुरु भएको हो । सोही मर्जपछि पूँजी संरचना मिलाउन यसले एफपीओ जारी गर्न लागेको हो । हाल यस लघुवित्तले १० जिल्लाहरुमा ४१ वटा शाखा कार्यालयहरु स्थापना गरी कारोबार गर्दै आइरहेको छ ।
चालु आर्थिक वर्षको तेस्रो त्रैमाससम्म आइपुग्दा सो लघुवित्त ५ करोड ९८ लाख ३० हजार रुपैयाँ नोक्सानमा रहेको छ । गत आर्थिक वर्षमा भने कम्पनीले ९ करोड १ लाख ७ हजार रुपैयाँ नाफा कमाएको थियो ।
You must be logged in to post a comment Login