विराटनगरः स्वर्गीय मनमोहन अधिकारी नेपालको लोकतान्त्रिक आन्दोलनका त्यागी र सादगी आदर्श नेता भएकाले उनको व्यक्तित्वलाई सबैले अनुशरण गर्नुपर्ने एक कार्यक्रमका वक्ताले बताएका छन् ।

स्वर्गीय अधिकारीको १०३ औ जन्मयन्तीको अवसरमा देशकै पहिलो मनमोहन प्राविधिक विश्वविद्यालयमा आयोजित कार्यक्रममा बोल्दै उपकुलपति डा सुवासश्री पोखरेलले स्वर्गीय नेता मनमोहन सबैको साझा र आदर्श नेता मात्र नभएर अनुकरणीय पनि भएकाले उनको योगदानलाई सबैले अनुशरण गर्नुपर्ने बताए ।

उपकुलपति पोखरेलले मनमोहनको त्याग र निष्ठाकै कारण देशमा प्रजातन्त्रको उदय भएको र निरङ्कुश पञ्चायती व्यवस्था ढलेर देशमा प्रजातान्त्र पुनस्र्थापित हुन सफल भएको उल्लेख गरे । स्वर्गीय नेता मनमोहनले प्रधानमन्त्रीका रुपमा नेतृत्व गरेको नौ महिने कार्यकाल हालसम्म देशकै रोल मोडल बन्न सफल भएकोमा आफूलाई गर्व लागेको उनको भनाइ थियो । भारतको स्वतन्त्रता आन्दोलनमा समेत योगदान गरेका नेता मनमोहन प्राविधिक शिक्षापे्रमी भएकाले उनकै परिकल्पनालाई सार्थक बनाउन मनमोहन पोलिटेक्निकदेखि हाल प्राविधिक विश्वविद्यालय बन्न सफल भएको स्मरण गरे ।

एमटियु (मनमोहन टेक्निकल युनिभर्सिटी) का रजिष्टार डा. दिलनाथ फुँयालले स्वर्गीय आदर्श नेता मनमोहन अधिकारीले सधै त्यागलाई प्राथमिकता दिएकाले उनलाई कुनै एउटा पार्टीको चस्मा लगाएर मात्र हेर्नु गलत हुने बताए । ‘आदर्श नेता मनमोहन लोभलालचमुक्त नेता थिए यसैले उनको योगदानलाई अहिलेका सबै नेता र कार्यकर्ताहरूले अनुकरण गर्नुपर्दछ’, रजिष्टार फुँयालले भने ।

मोरङको बुढीगंगा गाउँपालिका वडा नम्बर ४ हात्तीमुढास्थित प्राविधिक विश्वविद्यालमा मनमोहन जयन्तीको अवसरमा विश्वविद्यालयको इन्जिनियरिङ सङ्कायतर्फको स्नताक तह र आङ्गिक क्याम्पस पोलिटेक्निकतर्फका उत्कृष्ट विद्यार्थीहरूलाई सम्मानसहित प्रमाणपत्र वितरण गरिएको थियो । कार्यक्रममा एमटियुका उपकुलपति डा सुवासश्री पोखरेल रजिष्टार दिलनाथ फुयाल, ईन्जिनियर सङ्कायका डिन प्राडा प्रचण्डमान प्रधान, इलेक्ट्रिोनिक्स विभागीय प्रमुख डा दीपरत्न डङ्गोल, निमित्त परीक्षा नियन्त्रक भीम काफ्ले र मनमोहन पोलिटेक्निकका प्रिन्सिपल सुदीप अधिकारीलगायतले विद्यार्थीहरूलाई सम्मान गर्दै प्रमाणपत्र वितरण गरेका थिए । साथै मनमोहन जयन्तीको अवसरमा उनको सम्झनामा माल्यार्पण गर्दै विश्वविद्यालयमा वृक्षरोपण पनि गरिएको थियो ।