एशियन हाइवे निर्माणको क्रममा मोरङको सुन्दरहरैंचा नगरपालिका–७ ठडियामा अलकत्रा तयारी प्लान्ट स्थापना हुने भएपछि स्थानीयवासीले त्यसको कडा विरोध गर्ने निर्णय गरेका छन्। प्लान्ट नहटाइए आन्दोलनमा उत्रिने चेतावनीसमेत स्थानीयले दिएका छन्।

परिवर्तन टोल विकास संस्थाको अगुवाइमा आज बसेको संयुक्त भेलामा वडा नम्बर ७ भित्रका विभिन्न टोल विकास संस्थाका प्रतिनिधिहरूले बस्तीको बीचमा अलकत्रा प्लान्ट राख्न नदिने निर्णय गरेका हुन्। भेलामा जनस्वास्थ्य, वातावरण र कृषि बालीमा गम्भीर असर पर्ने भन्दै प्लान्ट तत्काल हटाउन माग गरिएको छ।

मधाहा एकता टोल विकास संस्थाका सचिव हरिश्चन्द्र ढुङ्गानाले अलकत्रा प्लान्टबाट निस्कने धुवाँ, गन्ध र रसायनले जनस्वास्थ्य तथा वातावरणमा नकारात्मक असर पार्ने भएकाले बस्ती नजिक यस्तो प्लान्ट राख्न नहुने बताउनुभयो।

बेलगाछी टोल विकास संस्थाका अध्यक्ष नरबहादुर गुरुङले स्थानीयवासीसँग कुनै समन्वय नगरी प्लान्ट राख्न अनुमति दिनु जनप्रतिनिधिको कमजोरी भएको आरोप लगाउनुभयो। उहाँले विकासका नाममा जनस्वास्थ्य र वातावरणलाई बेवास्ता गर्न नहुने धारणा राख्नुभयो।

चन्द्रसूर्य टोल विकास संस्थाका अध्यक्ष हरिप्रसाद आचार्यले आफूहरू विकासविरोधी नभएको स्पष्ट पार्दै वातावरणमैत्री र स्थानीयलाई असर नपर्ने स्थानमा प्लान्ट स्थापना गर्नुपर्ने बताउनुभयो। जनप्रतिनिधि र निर्माण कम्पनी दुवै पक्षको समन्वयको अभावले समस्या उत्पन्न भएको उहाँको भनाइ थियो।

परिवर्तन टोल विकास संस्थाकी अध्यक्ष सीता दाहालले समस्या समाधानका लागि वडा कार्यालय, नगरपालिका र सडक निर्माण आयोजनाको फिल्ड कार्यालयमा पटक–पटक ध्यानाकर्षण गराइसकेको जानकारी दिनुभयो।

त्यस्तै, परिवर्तन टोल विकास संस्थाका सचिव कुमार सुवेदीले बस्तीको बीचमा प्लान्ट राख्नु गलत भएको भन्दै बस्तीदेखि टाढा सुरक्षित स्थानमा अलकत्रा प्लान्ट निर्माण गर्नुपर्ने स्थानीयको साझा माग रहेको बताउनुभयो।

संयुक्त बैठकमा उपस्थित स्थानीयले जनप्रतिनिधि र निर्माण कम्पनीले टोलवासीसँग कुनै छलफल नगरेकोप्रति आश्चर्य, चिन्ता र आक्रोश व्यक्त गरेका थिए।

यसैबीच, सुन्दरहरैंचा नगरपालिका–७ का वडाध्यक्ष भुवनसिंह मगरले टोल विकास संस्थाहरूले उठाएका विषयप्रति वडाको ध्यानाकर्षण भएको बताउँदै सार्वजनिक सुनुवाइ वा जानकारीमूलक कार्यक्रम आयोजना गर्न आफू सहमत रहेको प्रतिक्रिया दिनुभयो।