विराटचोकः शिक्षा सन्देश इङ्लिस स्कुल बेलबारीले बाल साहित्य महोत्सव गर्ने भएको छ । मोरङको बेलवारीस्थित लालभित्तीमा रहेको सो स्कुलले माघ १५ र १६ गते बाल साहित्य महोत्सव गर्ने आइतबार विद्यालयमा आयोजित पत्रकार सम्मेलनमार्फत् जानकारी गराएको छ ।

किताबी ज्ञानले मात्र बालबालिकामा पूर्णता नहुने भएकाले अतिरिक्त क्रियाकलापलाई जोड दिँदै अन्य विद्यालयभन्दा फरक शैली अपनाइएको विद्यालयले जनाएको छ । साहित्य र कलाका क्षेत्रमा केही नौलो काम गर्ने हेतुले विद्यालयले बालबालिकाको रुचि, क्षमता र ज्ञान तथा सीपको मापन गराउने महोत्सवले सघाउ पुग्ने जनाएको छ । विद्यार्थीको आत्मविश्वास बढाउने खालका विभिन्न विधामा साहित्य महोत्सव नै आयोजना गरिने विद्यालयले जनाएको हो ।

बाल साहित्य महोत्सवअन्तर्गत कविता प्रतियोगिता, चित्रकला प्रतियोगिता, नाटक मञ्चन, बालसाहित्यका पुस्तक प्रदर्शनलगायत साहित्यसम्बन्धी अन्य कार्यक्रमसमेत गर्न लागिएको विद्यालयले जनाएको छ ।

बालबालिकाले समाजमा खारिएका साहित्यकारसँग बसेर साहित्यका विषयमा ज्ञन लिन पाउने र साहित्य विधामा प्रवेश गर्ने अवसरसमेत मिल्ने भएकाले यस्तो महोत्सव गर्न लागिएको विद्यालयका प्रिन्सिपल राजेश खत्रीले बताए ।

बाल साहित्य महोत्सवमा अभिभावकलाई अवलोकन गर्ने व्यवस्था समेत मिलाइएको बताइएको छ । यस्तै, अन्य विद्यालयका विद्यार्थीलाई समेत अवलोकन गराउने विद्यालयले पत्रकार सम्मेलनमार्फत् जनाएको छ । बालबालिकाहरु सांस्कृतिक कार्यक्रम, खेलकुद कार्यक्रममा केन्द्रित भइरहेको वर्तमान अवस्थामा यो नौलो र बेलबारीकै पहिलो बाल साहित्य महोत्सव भएको बताइएको छ ।

यो कार्यक्रमले फरकफरक क्षमता भएका बालबालिकालाई उनीहरुको रुचि के रहेछ भन्ने चिनाउन महत्वपूर्ण अवसर हुने विद्यालय व्यवस्थापन समितिका अध्यक्ष लक्ष्मणजंग थापाले बताए ।

पछिल्लो पुस्तामा साहित्यप्रति लगाव र आकर्षण घट्दै गएको अवस्थामा यो कार्यक्रमले बालबालिकालाई साहित्यप्रति जागरुक गराउन सक्ने विद्यालयले जनाएको छ । विद्यार्थीको ज्ञान, सीप र क्षमतालाई साहित्यमार्फत् दक्ष, प्रभावशाली र क्षमतावान् नागरिक बनाई गाउँ, समाज र राष्ट्रिय स्तरमा दखल राख्ने एक प्रतिभाशाली नागरिक बनाउने प्रमुख उद्देश्य रहेको विद्यालयका काउन्सिलर भुपाल बस्नेतले बताए ।