२६ चैत, काठमाडौं । नेपाल बार एसोसिएसनको निर्वाचनमा नेपाली कांग्रेस र नेकपा एमाले निकटका कानुन व्यवसायीका उम्मेदवार विजयप्रसाद मिश्रले मतान्तर झण्डै दोब्बरले बढाएका छन् । अध्यक्षका उम्मेदवार मिश्रले एक हजार २९५ मत प्राप्त गर्दा अर्का उम्मेदवार रमनकुमार श्रेष्ठले ६८२ मत ल्याएका छन् । श्रेष्ठ नेकपा माओवादी केन्द्र, राष्ट्रिय स्वतन्त्र पार्टी (रास्वपा) निकटका कानुन व्यवसायीको साझा उम्मेदवार बनेका छन् । पछिल्लो गणनामा मिश्रले जनकपुरमा ९८, नवलपरासीमा २६, कपिलवस्तुमा ३१, रुपन्देहीमा ८४, पाल्पामा ४९ मत प्राप्त गरेका छन् । अध्यक्षका अर्का उम्मेदवार श्रेष्ठले जनकपुरमा ४०, नवलपरासीमा १३, बुटवलमा ३१, कपिलवस्तुमा ५, रुपन्देहीमा २४, पाल्पामा १३ मत पाएका छन् ।

प्रधानमन्त्री केपी शर्मा ओलीले दुवै छिमेकी (भारत र चीनसँग) सुमधुर सम्बन्ध रहेको बताएका छन् । छिमेकीसँग नेपालको मित्रतालाई कसैले बिगार्न नसक्ने उनको दाबी छ ।  मधेश प्रदेश सभा बैठकलाई मंगलबार जनकपुरमा सम्बोधन गर्दै ओलीले छिमेकीसँग सम्बन्ध सुमधुर रहेको बताएका हुन् । ‘हाम्रा दुईवटा छिमेकी छन् । उनीहरूसँग सुमधुर सम्बन्ध छ । हल्ला गरिरहन्छन्, सम्बन्ध बिग्रियो भनेर । कहाँ बिग्रियो सम्बन्ध ?’ ओलीले प्रश्न गरे ।

छिमेक सम्बन्धबारे बुझाउन ओलीले केही उदाहरण दिए– सँगै सुत्नेले खुट्टो बोकाउँछ, अर्को बेडमा सुतेकोले बोकाउँदैन । खुट्टो हटाऊ भन्नुपर्‍यो, कुरा सिद्धियो । छिमेकमै हुनेको गाई फुकेर बाली खाइदिन्छ, टाढाको मान्छेकोले होइन । जोसँग कारोबार छैन, ऊसँग मित्रता मात्र हुन्छ, त्यहाँ केही लिनुदिनु छैन भने । जसको घर नजिकै छ, त्यहाँ छिमेकीको बच्चा आउँछ । बच्चाले एउटा ग्लास फुटाइदिन्छ । छिमेकीले भन्छ– कस्ता आमाबुवा रहेछन्, बच्चालाई गिलास फुटाउन हुन्न भनेर सिकाएको छैन । अर्कोदिन अर्को छिमेकीको बच्चा आएर कप फुटाइदिन्छ । छिमेकीले अस्तिको पैँचो सुनाउँछ । छिमेक भएकाले यस्तो कुरा आउँछ, बच्चा नभए गिलास कपसेट फुटाउने कुरा हुन्न । छिमेकमा सानातिना कुरा आउन सक्छन्, कुरा गर्नुपर्छ । पर्‍यो भने कप किन्दनुपर्छ । तर, पनि अन्डरस्ट्यान्डिङ राख्नुपर्छ छिमेकमा भएपछि । गिलासभन्दा ठूलो सम्बन्ध हो, मित्रता र समझदारी हो । छोराछोरीलाई थप्पड पनि नलगाऊ, हामी झडगा पनि नगरौं ।

यी उदाहरण सुनाएर ओलीले छिमेक सम्बन्धमा कहिलेकाहीँ सानातिना कुरा आए पनि छलफल गरेर समाधान गर्न सकिने बताए ।

‘कहिले–कहिले केही सानातिना कुरा उठेको हुन्छ, त्यसको अर्थ सम्बन्ध बिग्रियो भन्ने होइन । थप छलफलको आवश्यकता हुन्छ कहिले–कहले’ ओलीले भने, ‘दुई छिमेकीसँग सम्बन्ध अत्यन्त राम्रो छ, यस मित्रतालाई कसैले बिगार्न सक्दैन । खुला सिमानाका नाममा हुने बेठीक गतिविधि दुवैतर्फबाट रोक्नुपर्छ, खुला सिमानाको दुरुपयोग हुन दिनुहुँदैन । यसमा शतर्क रहनुपर्छ,’ ओलीले भने ।

प्रधानमन्त्री ओलीले गत शुक्रबार भारतीय प्रधानमन्त्री नरेन्द्र मोदीसँग थाइल्यान्डमा भेटवार्ता गरेका थिए ।