विराटचोकः सुन्दरहरैंचा नगरपालिकाको वडा नम्बर ५ मा रहेको हसिना सिमसार क्षेत्रमा भोलि विश्व सिमसार दिवसको अवसर पारी महोत्सवको आयोजना हुने भएको छ ।

महोत्सवको सम्पूर्ण तयारी पूरा भएको महोत्सव मूल आयोजक समितिका अध्यक्ष ज्ञानेन्द्र ओझाले बताए ।

महोत्सवमा विभिन्न सांस्कृतिक कार्यक्रम, विभिन्न जातजातिको झाँकी प्रदर्शन हुन्छ’, शनिबार साँझ भएको टेलिफोन सम्पर्कमा उनले भने, धरानको गरिमा डान्स सेन्टरको प्रस्तुतिका साथै स्थानीय कलाकारको प्रस्तुति रहने भएको छ ।’

सिमसारको गेटदेखि लगभग ५ सय मिटर दक्षिणसम्म सडकको दायाँबायाँ १ हजार ओटा नेपाली झण्डा फहराइने भएको छ । रातको समयमा शीत र पानीले झण्डा बिगार्न सक्ने हुनाले आइतबार बिहान मात्रै १ हजार झण्डा सडकको दुवैतर्फ फहराएर आगन्तुकको स्वागत गरिने मेला आयोजकले जनाएको छ ।

प्रदेश र सङ्घीय सरकारका मन्त्री, प्रदेश, सङ्घ र राष्ट्रिय सभाका सांसद, विभिन्न दलका नेता तथा पर्यटन व्यवसायीको कार्यक्रममा उपस्थिति हुने ओझाले बताए । महोत्सवका लागि सुन्दरहरैंचाको वडा नम्बर ५, सुन्दरहरैंचा नगरपालिका, प्रदेश पर्यटन मन्त्रालयलगायतले सहयोग गर्ने पनि उनले जानकारी दिए ।

हसिनाले हरेक वर्ष सिमसार दिवसको अवसर पारी मेला लगाउने गरेको थियो । यस पटक भने नेपाल भ्रमण वर्षको सन्दर्भलाई जोडेर औपचारिक रुपमा कार्यक्रम गर्न लागिएको आयोजकले जनाएको छ ।

मन्त्रीलाई डीपीआर बुझाइने
महोत्सव मूल आयोजक समितिका अध्यक्ष ओझाका अनुसार हसिना सिमसारको विकासका लागि डीपीआर तयार पारिएको छ । सो डीपीआर भोलि हुने कार्यक्रममा सङ्घीय पर्यटन मन्त्री योगेश भट्टराईलाई हस्तान्तरण गरिने कार्यक्रम पनि छ ।