इलामः दलित जनप्रतिनिधिको प्रदेश नं १ स्तरीय भेला तथा दक्षिण एशियाली दलित मिट–२०७६ माघ २४ र २५ गते इलाममा हुने भएको छ ।

आयोजकका अनुसार प्रदेशका करिब ३ सय ५० दलित जनप्रतिनिधि सो भेलामा सहभागी हुनेछन् । कार्यक्रममा दलित समुदायबाट प्रतिनिधित्व गर्ने सङ्घीय सांसद, प्रदेश सभा सदस्य, जिल्ला समन्वय समितिका प्रमुख–उपप्रमुख, सदस्य, स्थानीय तहका प्रमुख–उपप्रमुख तथा अध्यक्ष–उपाध्यक्ष र कार्यपालिका सदस्य तथा इलामका सम्पूर्ण दलित जनप्रतिनिधि सहभागी हुने बताइएको छ ।

अन्य ६ प्रदेश तथा भारत र भुटानबाट समेत १ सय जना आमन्त्रित सहभागी हुने मूल समारोह आयोजक समितिका संयोजक नवराज शङ्करले बताए । पहिलो दिनको कार्यक्रममा ‘दलित महिलाः अवसर, सम्भावना र चुनौती’ विषयमा सांसद तथा दलित अगुवा लक्ष्मी परियार, अनिता परियार र दुर्गा सोबबीच बहस हुने आयोजकले जनाएको छ ।

सोही दिन ‘दलित युवाः उद्यमशीलता र रोजगारी’ विषयमा नेपाल जेसिसका केन्द्रीय अध्यक्ष अशोक शङ्करसँग बहस हुने जनाइएको छ । साँझमा साहित्यकार महावीर विश्वकर्माको एकल साहित्य वाचन कार्यक्रम हुने भएको छ ।

दोस्रो दिन प्रदेशका १४ ओटै जिल्लाका जनप्रतिनिधिका टोलीनेताले स्थानीय तहको समीक्षात्मक अनुभव प्रस्तुति गर्ने बताइएको छ । त्यस्तै ‘नेपालमा जातपात र छुवाछुत’ बारे विश्वभक्त दुलाल (आहुति), ‘नेपालको दलित आन्दोलनः विगत, वर्तमान र भविष्य’बारे गणेश विक तथा दलित समुदायः आर्थिक, सामाजिक, सांस्कृतिक रूपान्तरणको सवाल विषयमा आम किसानले विचार राख्ने जनाइएको छ ।

‘दलित समुदायको समस्या र राज्य’ विषयमा सांसदद्वय छविलाल विश्वकर्मा र मीन विश्वकर्मा तथा विनोद पहाडीबीच बहस हुने भएको छ । त्यसैगरी दलित समुदायको पेशा संरक्षण र आधुनिकीकरणका विषयमा तीन सफल दलित व्यवसायीसँग बहस हुने तथा इलाम घोषणापत्र जारी गरी कार्यक्रम समापन गरिने आयोजकले जनाएको छ ।