विराटचोकः प्रदेश नम्बर १ को राजधानी विराटनगरलाई जोड्ने विराटचोक–घिनाघाट ४ लेन सडक निर्माणको ३० प्रतिशत काम सम्पन्न भएको सचिवस्तरीय अनुगमले जनाएको छ ।

शुक्रबार भौतिक पूर्वाधार विकास मन्त्रालय प्रदेश १ विराटनगरका सचिव राजेशप्रसाद घिमिरे, पूर्वाधार विकास कार्यालय मोरङका सिनियर डिभिजन इञ्जिनियर सुशील श्रेष्ठ, प्रदेश सांसद राजकुमार ओझा, सुन्दरहरैंचा नगरपालिकाकी उपप्रमुख धनमाया तामाङलगायतको टोलीले योजनाको अनुगमन गरेको छ ।

प्रदेश १ का मुख्यमन्त्री शेरधन राईले ग्रामथान गाउँपालिकाको नेताचोकमा भदौ २३ गते प्रदेश सरकारको गौरवको योजना मानिएको यो सडक शिलान्यास गरेका थिए । २२ किलोमिटर लामो ४ लेनको यो सडक प्रदेशकै गौरवको योजनाका रूपमा लिइएको छ । २ वर्षभित्र निर्माण कार्य सम्पन्न गर्ने गरी श्रेष्ठ रमण एपेक्स कम्पनीले निर्माण कार्यलाई तीव्रता दिएको छ । समयमै गौरवको आयोजना सक्ने गरी कामलाई द्रुत गतिमा अगाडि बढाइएको कम्पनीले जनाएको छ ।

भौतिक पूर्वाधार विकास मन्त्रालयका सचिव सहितको टोलीले गरेको अनुगमनमा स्थानीय नागरिकले ४ लेन सडक बनाउँदा छेउछेउमा पानीको निकास अनिवार्य बनाउनुपर्ने माग गरेका छन् ।

वर्षाको समयमा डुुबानको समस्या हुने भएकाले सरकारले यसलाई समयमै सोचेर काम नगरे समस्या हुने बताएका थिए । यस्तै हरैंचामा भएको मन्दिरलाई जग्गा खोजेर सार्न सहमति गरे सरकारले सहयोग गर्ने मन्त्रालयका सचिव घिमिरेले बताएका छन् ।

यो अनुगमनबाट सुन्दरहरैंचा क्षेत्रको बढ्दो बजारीकरण देखिएकाले ड्रेन निर्माण गर्नुपर्ने देखिएको समेत बताएका छन् । प्रदेश सरकारको ढिकुटी हेरेर ड्रेन बनाउने विषयमा छलफल गर्ने घिमिरेको भनाइ छ । यस्तै सडकमा रहेका पोल सार्नका लागि टेन्डर आह्वान गरिएको र चाँडै पोल सार्ने बताएका छन् ।यसैगरी, सडक किनारमा रहेका रुख काट्ने प्रक्रियामा गइसकेको बताए ।

प्रदेश राजधानी विराटनगर भित्रन र बाहिरिनका लागि यो सडक वैकल्पिक मानिन्छ । सांसद राजकुमार ओझाले पनि हरैंचाको मन्दिर निर्माण गर्न मन्त्रालयबाट सहयोग गर्ने वचन आएको र सार्न सहमति हुने विश्वास लिइएको बताएका छन् । यस्तै खानेपानीका पाइपमा समस्या र नाला निर्माण गर्नुपर्ने जनताको मागलाई सम्बोधन गरिने बातावरण मिलाउने वचन दिएका छन् । अहिले सकडका सबै भागमा दुवै तर्फको ड्रेन निर्माण गरी माटो पुर्ने र साना पुल निर्माण गर्ने काम धमाधम भइरहेको छ ।

असोज १ गतेदेखि निर्माणकार्य शुरु भएको बस्ती क्षेत्रमा ६४ मिटर र बस्ती नभएको क्षेत्रमा ५६ मिटर हुने गरी सडकको डिजाइन गरिएको छ । सडकको बीच भागबाट दुवैतर्फ ३५–३५ फिट सडक कालोपत्रे हुने भएको छ ।