विराटचोकः पारिवारिक, शैक्षिक र सामाजिक परिवेश राम्रो भए मात्रै नैतिकवान् विद्यार्थी उत्पादन हुन सक्ने पूर्व प्रधानमन्त्री एवम् नेकपाका नेता माधवकुमार नेपालले बताएका छन् ।

मोरङको सुन्दरहरैंचा–३ गछियामा रहेको माउण्ट मकालु आवासीय माध्यमिक विद्यालयको रजत जयन्ती समारोहलाई सम्बोधन गर्ने क्रममा उनले यस्तो बताएका हुन् ।

शिक्षाका ४ स्तम्भ भएको उल्लेख गर्दै उनले बुझ्नका लागि, काम गर्नका लागि, सामुहिकताको भावना विकास गर्नका लागि र सङ्कल्प लिनको लागि शिक्षा आवश्यक पर्ने उनको भनाइ थियो । शिक्षाको गुणस्तरको लागि अनुभव प्राप्त शिक्षण संस्थाले ध्यान दिनुपर्ने उनले बताए ।

शिक्षा प्रणालीमा सुधार गर्न अहिलेको सरकार लागिपरेको उल्लेख गर्दै उनले पर्यटनको क्षेत्रमा पनि सरकारले धेरै काम गर्न बाँकी रहेको बताए ।

कार्यक्रमलाई सम्बोधन गर्दै निजी तथा आवासीय विद्यालय अर्गनाइजेशन (प्याब्सन) का केन्द्रीय उपमहासचिव आरबी कटुवालले संस्कारयुक्त शिक्षा आजको आवश्यकता भएको बताए ।

कार्यक्रमका प्रमुख अतिथि नेपालले विद्यालयको नवनिर्मित भवन ‘प्रेमलाल स्मृति भवन’ को पनि शिलान्यास गरे । त्यस्तै विद्यालयको रजत स्मारक स्तम्भ तथा विज्ञान प्रदर्शनीको पनि उनले उद्घाटन गरेका थिए ।

अन्तर्राष्ट्रिय जुनियर साइन्स अवार्डमा कास्य पदक विजेता सो विद्यालयमा कक्षा १० मा अध्यनरत विद्यार्थी नितेष गौतम र उनका मातापिता मुकुन्द तथा उमा गौतमलाई सम्मान गरेका थिए । त्यस्तै, अभिभावकका पनि अभिभावक रामबहादुर थापा र दुखनीदेवी चौधरीलाई सम्मान गर्नुका साथै जनता मावि सुन्दरहरैंचा ३ लाई २ थान कम्प्युटर र जनता आधारभूत विद्यालय सुन्दरहरैंचा ३ लाई १ थान प्रिन्टर शैक्षिक सामग्रीको रुपमा प्रदान गरिएको थियो ।

विद्यालयका प्रिन्सिपल हेमन्त कार्कीले विद्यालयको प्रतिवेदन प्रस्तुत गरेका थिए । कार्यक्रममा विभिन्न कक्षाका विद्यार्थीले ऐतिहासिकतामा आधारित नृत्य तथा अन्य मनोरञ्जनात्मक नृत्य प्रस्तुत गरेका थिए ।

कार्यक्रममा नगरका अन्य विद्यालयका संस्थागत तथा सामुदायिक विद्यालयका शिक्षक, राजनीतिक दलका प्रतिनिधि, जनप्रतिनिधि, अभिभावकलगायतको बाक्लो उपस्थिति थियो ।

रजत महोत्सवको दोस्रो तथा अन्तिम दिन आइतबार बिहान ९ बजे प्यारेन्टिङ कार्यक्रम हुने पनि विद्यालयले जनाएको छ ।