विराटचोकः पछिल्लो समय अप्रत्याशित रुपमा नेपाली शेयर बजारमा उत्साह छाएको छ । बजारको सूचक दिनहुँ उच्च अङ्कले बढ्न पुग्यो भने कारोबार भएको रकम, शेयर सङ्ख्या, कारोबार सङ्ख्या, अनलाइन कारोबार सबैले रेकर्ड नै रेकर्ड बनाए । कारोबार हुने अन्तिम दिन बैंक समूह एक्लैले नै बजारलाई उच्च अङ्कले माथि तान्यो । अरु २ समूहको सूचक सामान्य बढ्दा बाँकी ९ समूहका सूचक तल झरे पनि नेप्से २ प्रतिशतले बढ्यो भने कारोबार रकमले नयाँ रेकर्ड बनायो ।

गत साताको पहिलो कारोबार दिन ३ अर्ब ६० करोड रुपैयाँ बराबरको कारोबार गरी नेप्सेले अघिल्लो साताको अन्तिम कारोबार दिन बनेको उच्च कारोबार रकमको रेकर्डलाई तोडेको थियो । तर, सो रेकर्ड बुधबार ४ अर्ब १५ करोड रुपैयाँभन्दा बढीको कारोबार भई तोडिएको थियो । त्यसको भोलिपल्ट बिहीबार नै ४ अर्ब ४६ करोड बराबरको कारोबार भइ बुधबारको रेकर्ड पनि तोडिएको थियो ।

साताको अन्तिम कारोबार दिन कुल बजार पूँजीकरण २० खर्ब ८३ अर्ब पुगेको छ । यो हालसम्मकै सबैभन्दा बढी पूँजीकरण हो । यस अघि उच्च पूँजीकरणको रेकर्ड २०७३ साउन १२ गते बनेको थियो । सो दिन नेप्सेको कुल बजार पूँजीकरण २० खर्ब ७० अर्ब रहेको थियो । सो दिन नेप्से १ हजार ८ सय ८१ बिन्दुमा पुगेको थियो ।

त्यसैगरी, फ्लोटेड बजार पूँजीकरणले पनि यस साता नयाँ रेकर्ड बनाएको छ ।  साताको अन्तिम कारोबार दिन फ्लोटेड बजार पूँजीकरण ७ खर्ब ५९ अर्ब रुपैयाँ पुगेको छ । जुन हालसम्मकै उच्च हो ।

 साताको अन्तिम कारोबार दिन १ करोड ८ लाख ५९ हजार ६ सय ५६ कित्ता शेयर खरिदबिक्री भएको छ । २०७३ माघ २७ गते हालसम्मकै सर्वाधिक १ करोड ५४ लाख १४ हजार कित्ता शेयर खरिदबिक्री भएको रेकर्ड भने तोडिन सकेको छैन ।

साप्ताहिक कारोबार रकममा पनि नयाँ रेकर्ड कायम भएको छ । गत साता नेप्सेको साप्ताहिक कारोबार रकमले अघिल्लो साताको साप्ताहिक कारोबार रकमको रेकर्ड तोडेको हो । गत साता नेप्सेमा १८ अर्ब ६२ करोड ६६ लाख रुपैयाँ बराबरको शेयर किनबेच भयो । अघिल्लो साता ११ अर्ब २० करोड रुपैयाँ बराबरको शेयर खरिदबिक्री भई सर्वाधिक साप्ताहिक कारोबार रकमको रेकर्ड बनाएको थियो ।