विराटचोकः नेपाल विद्युत प्राधिकरणले कम बिजुली उपभोग गर्ने ग्राहकका लागि सहुलियत दरमा बिजुली उपलब्ध गराउन प्रस्ताव गरेको छ । विद्युत् नियमन आयोगले सो महसुललाई स्वीकृत गरेपछि लागू हुने प्राधिकरणले जनाएको छ ।

यस्तो छ प्रस्तावित विद्युत महसुल दर । सबैभन्दा कम अर्थात् २० युनिटसम्म विद्युत् खपत गर्ने ग्राहकलाई मासिक रु ३० मा विद्युत् उपलब्ध गराउने प्रस्ताव गरिएको छ । ५ एम्पियरमा विद्युत् लिने ग्राहकले बढीमा रु ३५ महसुल तिरे पुग्नेछ । त्यस्तै १५ एम्पियरमा विद्युत् लिनेले न्यूनतम शुल्क रु ५०, ३० एम्पियरमा विद्युत् लिनेले रु ७५ र ५० एम्पियरमा रु १ सय २५ न्यूनतम महसुल लिने प्रस्ताव गरिएको छ ।

२१ युनिटदेखि ३० युनिटसम्म पाँच एम्पियरमा विद्युत् लिनेले न्यूनतम रु ५०, १५ एम्पियरमा रु ७५, ३० एम्यिपरमा रु १ सय र ६० एम्पियरमा रु १ सय ५० न्यूनतम महसुल तिर्नुपर्नेछ । यसैगरी ३१ देखि ५० युनिटसम्म न्यूनतम रु ७५, ५१ देखि १ सय ५१ युनिटसम्म रु १ सय, १ सय ५१ युनिटदेखि २ सय ५० युनिटसम्म रु १ सय २५, २ सय ५१ युनिटदेखि ४ सय युनिटसम्म न्यूनतम रु १ सय ५० महसुल तिरे हुनेछ ।

४ सय युनिटभन्दा माथि न्यूनतम रु १ सय ७५ महसुल तोकिएको छ । त्यसमा केही सेवा शुल्क भने थप हुने व्यवस्था छ ।

प्राधिकरणले औद्योगिक ग्राहकमा पनि ग्रामीण तथा घरेलु उद्योग र साना उद्योगको फरकफरक महसुल दर प्रस्ताव गरेको छ । व्यापारिक, गैर व्यापारिक, सिँचाइ, खानेपानी, यातायातका लागि चार्जिङ स्टेशनसमेतको महसुल दर प्रस्ताव गरेको छ । मन्दिर, सडकबत्ती, अस्थायी कनेक्सन, गैर गार्हस्थ्य र मनोरञ्जन व्यवसायको समेत छुट्टाछुट्टै महसुल दर तय गरेको छ ।

वैशाखदेखि मङ्सिरसम्म र पुसदेखि चैतसम्मको पनि फरकफरक महसुल दर प्रस्ताव गरिएको छ । साना ग्राहकलाई बढीभन्दा बढी सुविधा दिने लक्ष्यसहित प्राधिकरणले नयाँ महसुल प्रस्ताव गरेको हो ।