धनकुटाः धनकुटाको महालक्ष्मी नगरपालिका वडा नम्बर ४ दमारमा आधारभूत स्वास्थ्य केन्द्र सञ्चालनमा आएको छ । ४ कोठे पक्की भवन ३३ लाख ६६ हजार रुपैयाँको लागतमा निर्माण गरी स्वास्थ्य सेवा शुरु गरिएको हो ।

महालक्ष्मी नगरपालिकाका प्रमुख पर्शुराम नेपाल र उप–प्रमुख मञ्जु अधिकारीले रिबन काटेर तथा शिलालेखमा राखिएको पर्दा उघारेर भवन उद्घाटन गरेका हुन् । गाउँमै सहज रुपमा आधारभूत स्वास्थ्य सेवा उपलब्ध गराउन स्वास्थ्य केन्द्र भवन निर्माण गरिएको नगरप्रमुख नेपालले बताए ।

सो स्वास्थ्य केन्द्रमा अहिले दुई अहेब र एक जना कार्यालय सहयोगी कार्यरत रहेका छन् ।

विराटचोकः साउन ११ गते राति सवा ९ बजे मोरङको बेलबारी नगरपालिका वडा नं. ३ मा पैदलयात्रीलाई ठक्कर दिई फरार रहेका सवारी चालकलाई बेलबारी प्रहरीले पक्राउ गरी सार्वजनिक गरेको छ ।

सो दिन पूर्व–पश्चिम राजमार्गमा पूर्वबाट पश्चिमतर्फ आउँदै गरेको तत्काल नम्बर नखुलेको पिकअपले पैदल यात्री अन्दाजी ६० वर्षीय ‘महन’ भनिने व्यक्तिलाई ठक्कर दिई घाइते बनाएको थियो । तत्काल सो सवारीको पहिचान खुलेको थिए । पछि इलाका प्रहरी कार्यालय बेलबारीले सुक्ष्म रूपमा अनुसन्धान गरी सवारी चालकलाई पक्राउ गरेको थियो ।

प्रहरीका अनुसार धादिङको जुङ्गीखोला गाउँपालिका वडा नं. ४ बस्ने अन्दाजी ३२ वर्षीय रामकृष्ण पौडेललाई प्रहरीले साउन १४ गते पक्राउ गरेको हो । उनले चलाएको बाग्मती प्रदेश ०१–०२४ च ९९१३ नम्बरको पिकअपले ठक्कर दिएको खुल्न आएकाले हुँदा चालक तथा पिकअपलाई नियन्त्रणमा लिई थप अनुसन्धान भइरहेको इलाका प्रहरी कार्यालय बेलबारीले जनाएको छ ।

बेलबारीः मोरङको बेलबारी नगरपालिका वडा नम्बर ९ तिनकुटियास्थित सडक खण्डमा मोटरसाइकल दुर्घटना हुँदा एक जनाको मृत्यु भएको छ भने एक जना घाइते भएका छन् ।

मृत्यु हुनेमा मोटरसाइकल चालक बेलबारी– ९ का २८ वर्षीय उमेश चौधरी रहेका छन् । हिजो राती १० बजे दक्षिणबाट उत्तर जाँदै गरेको प्र. १–०२–०४३प ५७६८ नम्बरको मोटरसाइकल अनियन्त्रित भई सडकको छेउमा रहेको बिजुलीको पोलमा ठक्कर खाई दुर्घटना भएको थियो । सो दुर्घटनामा परी गम्भीर घाइते भएका चौधरीको न्युरो अस्पताल विराटनगरमा राती ११ बजे मृत्यु भएको थियो ।

त्यस्तै, सो मोटरसाइकल पछाडि सवार सोही स्थानका ३० वर्षीय श्रवणकुमार विश्वास घाइते भएकाले सोही अस्पतालमा नै उपचार भइरहेको छ । दुर्घटना भएको मोटरसाइकल अस्थायी प्रहरी चौकी डाँगाबजारमा रहेको प्रहरीले जनाएको छ ।