विराटचोकः मोरङको सुन्दरहरैंचा नगरपालिकाले नगरलाई विकासको बगैंचा बनाउने उद्घोष गरी ‘सुन्दरहरैंचा, विकासको बगैंचा’ नारा नै तय गरेको छ ।

सुन्दरहरैंचामा स्वास्थ्यको क्षेत्रमा नमूना काम गर्ने भनी झण्डै २ वर्षअघि एउटा महाअभियान थालिएको छ । नगर क्षेत्रभित्र पूर्वपश्चिम राजमार्गमा ६ ओटा र विराटचोक– विराटनगर मार्गको हरैंचामा एउटा गरी ७ ओटा सार्वजनिक शौचालय बनाउने तयारी गरिएको थियो ।

शौचालय निर्माण महाअभियानअन्तर्गत सुन्दरहरैंचाको खोर्साने, विराटचोक, सलकपुर, गोठगाउँ, गछिया, बलिया र हरैँचामा शौचालय बन्ने भएका हुन् । यी ७ स्थानमध्ये हरैँचाबाहेक अरु सबै स्थान पूर्वपश्चिम राजमार्गमा पर्दछन् ।

यीमध्ये हाल ४ ओटा शौचालयमात्रै निर्माणाधीन अवस्थामा छन् । खोर्साने, विराटचोक, सलकपुर र हरैँचामा मात्रै शौचालय निर्माणाधीन अवस्थामा छन् ।

सार्वजनिक शौचालय निर्माण महाअभियान समितिका सहसंयोजक तथा कोशीहरैंचा उद्योग वाणिज्य सङ्घका अध्यक्ष नवराज चापागाईंका अनुसार यी शौचालयमा आधुनिक पुस्तकालयसहितको सुविधा हुनेछ । अहिले बनिरहेका प्रत्येक शौचालय १ करोड हाराहारीको लागतमा बन्ने उनले बताए । चापागाईका अनुसार ७ ओटै शौचालय एउटै डिजाइनमा निर्माण हुनेछन् । सबै शौचालय निर्माण सम्पन्न गर्दा ९ करोड लाग्ने बताइएको छ .

युरोपेली मापदण्ड अनुसार निर्माण हुने यी शौचालयमध्ये सलकपुर र विराटचोकमा बनिरहेका शौचालय भने पुससम्ममा सञ्चालनमा आउने छन् । निर्माण भइरहेका शौचालय बनाइसक्नासाथ अन्य स्थानका शौचालय निर्माणको लागि पहल थालिने उनको भनाइ छ ।

अहिले बनिरहेका शौचालयको लागि सुन्दरहरैंचाका उद्योगी, व्यापारी र नगरपालिकाको सहयोग रहेको छ । त्यस्तै, विदेशमा बस्ने सुन्दरहरैंचावासीले पनि आर्थिक सहयोग गरेको चापागाईले जानकारी दिए ।