विराटचोकः मोरङको सुन्दरहरैंचा नगरपालिकामा बनेका २ वटा अत्याधुनिक सार्वजनिक शौचालयको भोलि मंगलबार उद्घाटन हुने भएको छ । नगरपालिका क्षेत्रका ७ स्थानमा शौचालय निर्माण गर्ने उद्देश्यले सुन्दरहरैंचा उद्योग वाणिज्य संघद्वारा गठित सार्वजनिक शौचालय निर्माण महाअभियान समितिको अगुवाइमा निर्माण भएकामध्ये विराटचोक र सलकपुरका शौचालय निर्माण सम्पन्न भएका हुन् । खोर्साने, हरैंचा, गोठगाउँ, बलिया र गछिया बजारमा शौचालय बन्ने क्रममा छन् ।

विराटचोकमा पश्चिम बस स्टेण्डको दक्षिणमा र सलकपुरमा चोकभन्दा पूर्वतर्फ बनेका २ वटा शौचालय भोलि उद्घाटन हुने भएका हुन् । जसका लागि नगरपालिकाले ३५ प्रतिशत लगानी गरेको छ भने ६५ प्रतिशत स्थानीयबासीबाट संकलन गरिएको छ ।

यस्ता छन् अत्याधुनिक शौचालयका विशेषताः
शौचालयमा पुस्तकालय र एसीजडित सैलुन रहनेछन् । यस्तै धूमपान गर्नेका लागि अलग्गै कोठा (स्मोकिङ जोन) बनाइएको छ । मोबाइल चार्ज गर्ने र नुहाउने व्यवस्था तथा महिलाहरुका लागि सेनेटरी प्याडको समेत व्यवस्था गरिएको छ । शौचालयको सरसफाइ गर्ने कर्मचारीका ७ परिवार शौचालयको सबभन्दा माथिल्लो तलामा बस्नेछन् । अपाङ्गमैत्री सो शौचालयको सुरक्षाका लागि गार्ड रुम पनि बनाइएको छ ।

शौचालय निर्माण महाअभियानका संयोजक भोलेश्वर दुलालका अनुसार बीचको तलामा इ लाइब्रेरी रहनेछ । कुनै संघसंस्थाले गोष्ठी वा सेमीनार गर्नुपरेमा त्यसको लागि हलको व्यवस्था पनि दोस्रो तलामा हुने भएको छ ।

सैलुन, कफी सप, स्मोकिङ जोनको साथै तौल नाप्ने मेसिन, मोबाइल चार्ज गर्ने ठाउँ र शौचालय तल्लो तलामा रहने बताइएको छ । युरोपियन मापदण्ड अनुसार बनिरहेका ४ वटा शौचालयको लागि ४ करोड रुपैयाँ खर्च भइसकेको दुलालले बताए । सलकपुर र विराटचोकका शौचालय भोलि उद्घाटन हुनेछन् भने हरैँचा र खोर्सानेका शौचालयमा ढलानको काम भइरहेको छ । गोठगाउँ, गछिया र बलियामा बन्ने शौचालयको निर्माणकार्य पनि दशैंअघि नै शुरु हुने दुलालले जानकारी दिए ।

शौचालय भवनको दोस्रो तलामा रहने पुस्तकालयका लागि पुस्तक संकलन कार्य भइरहेको छ । यसका लागि इन्द्रपुर जेसीजले समन्वय गरिरहेको छ ।

इन्द्रपुर जेसीजका अध्यक्ष गणेशप्रसाद भट्टराईका अनुसार दुवै ठाउँका पुस्तकालयका लागि लगभग ८ सय थान पुस्तक संकलन भइसकेका छन् । थप २ सय पुस्तक भोलिसम्ममा संकलन हुने र दुवै ठाउँका पुस्तकालयमा ती पुस्तक राखिने उनले बताए ।

पुस्तक संकलनको लागि जेसीजका १ सय ५६ शाखालाई अनुरोध गरिएको छ । इन्द्रपुर जेसीजको पहलामा ५ सय थान पुस्तक काठमाडौंबाट आइसकेको छ । साहित्यिक पुस्तक बढी रहने ती पुस्तकालयमा बालबालिकाका लागि पठनयोग्य सामग्रीका साथै धर्म संस्कृतिसँग सम्बन्धित पुस्तक पनि रहने उनले जानकारी दिए ।

दुवै ठाउँको पुस्तकालय व्यवस्थापनका लागि तत्काललाई २ जना कर्मचारीको व्यवस्था गरिसकिएको तथा आज बेलुकासम्ममा दुवै ठाउँमा कम्प्युटर जडान गरी पुस्तकको अभिलेख कम्प्युटर पद्धतिमा राखिने भट्टराईले बताए ।

मुख्य मन्त्री राई द्वारा निर्माणधिन पुस्तकालयसहितको सार्वजनिक शौचालय अवलोकन