विराटचोकः मोरङको सुन्दरहरैंचा नगरपालिकामा बन्दै गरेका पुस्तकालयसहितको सार्वजनिक शौचालय प्रदेश १ का मुख्य मन्त्री शेरधन राईले अवलोकन गरेका छन् । शुक्रवार प्रदेश सांसद राजकुमार ओझा, नगरउपप्रमुख धनमाया तामाङ, कोसीहरैचा उद्योग वाणिज्य सङ्घका अध्यक्ष नवराज चापागाईलगायतको उपस्थितिमा अवलोकन गरिएको हो ।

अवलोकनका क्रममा प्रदेश सांसद ओझाले शौचालय निर्माणको अवस्थाबारे मुख्य मन्त्रीलाई जानकारी गराएका थिए । कोसीहरैचा उद्योग वाणिज्य सङ्घका अध्यक्ष चापागाईले प्रदेश सरकारको तर्फबाट पनि अन्य स्थानमा बन्ने भएकाले सहयोगको अपेक्षा सहिति अवलोकन गराइएको बताएका छन् । 
मुख्य मन्त्री अवलोकनमा पुग्दा पुस्तकालय बनाउन कामदार खटिरहेका थिए । बिहान, बेलुका र रात नभनी यो भवन निर्माणका लागि कामदार लागि परेका छन् । सलकपुर र विराटचोकको काम भने अन्तिम चरणमा पुगेको छ ।

यसरी बन्दै छन् शौचालय
नगरपालिकाले नगरलाई विकासको बगैंचा बनाउने उद्घोष गरी ‘सुन्दरहरैंचा, विकासको बगैंचा’ नारा नै तय गरेको छ । सुन्दरहरैंचामा स्वास्थ्यको क्षेत्रमा नमूना काम गर्ने भनी झण्डै २ वर्षअघि एउटा महाअभियान थालिएको छ । नगर क्षेत्रभित्र पूर्वपश्चिम राजमार्गमा ६ ओटा र विराटचोक– विराटनगर मार्गको हरैंचामा एउटा गरी ७ ओटा सार्वजनिक शौचालय बनाउने तयारी गरिएको थियो ।

शौचालय निर्माण महाअभियानअन्तर्गत सुन्दरहरैंचाको खोर्साने, विराटचोक, सलकपुर, गोठगाउँ, गछिया, बलिया र हरैँचामा शौचालय बन्ने भएका हुन् । यी ७ स्थानमध्ये हरैँचाबाहेक अरु सबै स्थान पूर्वपश्चिम राजमार्गमा पर्दछन् । यीमध्ये हाल ४ ओटा शौचालयमात्रै निर्माणाधीन अवस्थामा छन् । खोर्साने, विराटचोक, सलकपुर र हरैँचामा मात्रै शौचालय निर्माणाधीन अवस्थामा छन् ।

निर्माणधिन शौचालयको पहिलो तल्लामा अडियो भिडियो सुविधा सहित पुस्तकालय बन्दैछ भने यो शौचालय यूरोपियन मापदण्डको हुन्छ । शौचालयमा चमेना गृह, शैलुन, आराम कक्ष र इन्टरनेटको सुविधा हुने छ ।
अहिले बनिरहेका प्रत्येक शौचालय १ करोड हाराहारीको लागतमा बन्ने छन् । ७ ओटै शौचालय एउटै डिजाइनमा निर्माण हुनेछन् । सबै शौचालय निर्माण सम्पन्न गर्दा ९ करोड लाग्ने बताइएको छ ।  यी शौचालयमध्ये सलकपुर र विराटचोकमा बनिरहेका शौचालयको काम अन्तीम चरणमा पुगेकाले चाँडै सञ्चालनमा आउने भएका छन् ।  अहिले बनिरहेका शौचालयको लागि सुन्दरहरैंचाका उद्योगी, व्यापारी र नगरपालिकाको सहयोग रहेको छ । त्यस्तै, विदेशमा बस्ने सुन्दरहरैंचावासीले पनि आर्थिक सहयोग गरेको गरिरहेका छन् ।