विराटचोकः सुन्दरहरैंचा नगरपालिकाले ८० वर्षमाथिका ज्येष्ठ नागरिकलाई घरमै गएर निःशुल्क स्वास्थ्य परीक्षण गर्नुका साथै निःशुल्क औषधी दिइने भएको छ । ८० वर्षमाथिका नागरिकलाई बैंकका कर्मचारीमार्फत् सामाजिक सुरक्षा भत्ता पनि घरमै दिइने भएको छ ।
यस्तो छ आज प्रस्तुत आगामी आर्थिक वर्षको लागि नगरपालिकाले लिने नीति तथा कार्यक्रममा स्थानीय सामाजिक विकाससम्बन्धी नीतिअन्तर्गत स्वास्थ्यसम्बन्धी लिइने १० नीतिहरुः
१. ८० वर्षमाथिका जेष्ठ नागरिक तथा शारीरिक रूपमा पूर्ण अपाङ्गता भएका व्यक्तिहरूलाई घरमा गई बैंकका कर्मचारीमार्फत् सामाजिक सुरक्षाभत्ता वितरण गरिने तथा निःशुल्क स्वास्थ्य जाँच गरी नेपाल सरकारले उपलब्ध गराउने निःशुल्क औषधीसमेत सोही समयमा उपलब्ध गराइने,
२. गर्भवती महिला स्वास्थ्य केन्द्रमा नै प्रसूति हुन प्रोत्साहन गर्ने, प्रसूतिका लागि अस्पतालसम्म जान निःशुल्क एम्बुलेन्स सेवा उपलब्ध गराइने,
३. स्पाइनल इन्जुरीका कारण अपाङ्गता भएका लगायत गम्भीर प्रकृतिको अपाङ्गता भएका व्यक्तिहरूको पुनस्र्थापना तथा आवश्यक सहयोग गरिने,
४. स्वास्थ्य बीमा कार्यक्रमलाई पूण रुपमा कार्यान्वयनमा ल्याइने, प्रत्येक नागरिकको अनिवार्य स्वास्थ्य बीमा गर्ने, ज्येष्ठ नागरिक, विपन्न, दलित, एकल महिला, कडा रोगी र अपाङ्गता भएका व्यक्तिहरूको स्वास्थ्य बीमा शुल्कमा सहुलियत दिइने तथा निःशुल्क गरिने,
५. स्वास्थ्य शिविर सञ्चालन, प्रजनन् स्वास्थ्य, पोषण सेवासम्बन्धी कार्यक्रम सञ्चालन गरिनेछ,
६. प्रत्येक वडामा स्वास्थ्य चौकी निर्माण र सञ्चालन गर्ने, त्यसका लागि आवश्यक स्वास्थ्य उपकरण तथा जनशक्ति व्यवस्थापन गरिने,
७. नगर अस्पताललाई विशेषज्ञ सेवा, फार्मेसी तथा प्रयोगशालासहितको थप सुदृढ सेवा उपलब्ध गराउन नगर अस्पतालको भवनसहित आवश्यक भौतिक पूर्वाधार निर्माण गरिने र दक्ष जनशक्ति व्यवस्थापन गरिने,
८. आधारभूत तथा सहरी स्वास्थ्य केन्द्रहरूलाई स्तरउन्नति र थप व्यवस्थित गरी सञ्चालन गर्नुको साथै सरकारबाट प्राप्त हुने निःशुल्क औषधीहरू आधारभूत तथा सहरी स्वास्थ्यकेन्द्रमार्फत् वितरणको व्यवस्था मिलाइने,
९. वडा नं. ११ मा रहेको सुवर्ण फर्मास्युटिकललाई औषधी उत्पादन केन्द्रका रूपमा सञ्चालन गर्न पहल गरिने,
१०. वडा नं. ११ मा शिलान्यास भएको प्रादेशिक सरुवा रोग अस्पताल यथाशीघ्र निर्माणका लागि पहल गरिने ।
कक्षा ५ सम्म स्थानीय पाठ्यक्रम लागू गरिने, यस्तो छ सुन्दरहरैंचाले ल्याएको शिक्षासम्बन्धी नीति
सुन्दरहरैंचा नगरपालिकाको नीति तथा कार्यक्रम सार्वजनिक, ५ वटा मूलभूत नीतिका आधारमा बजेट ल्याइने
You must be logged in to post a comment Login