विराटचोकः सुन्दरहरैचा –५ बुढी खोलाको पुलबाट गाँजासहित प्रहरीले ३ जनालाई पक्राउ गरेको छ । पक्राउ पर्नेमा धनकुटाको साँगुरीगढी –८ का ३० वर्षीय सुरेन्द्र राई, २९ वर्षीय मिलन राई र २९ वर्षीय बाला राई रहेका छन् ।

हिजो बेलुका ५ बजे जिल्ला प्रहरी कार्यालय मोरङ र अस्थायी प्रहरी पोष्ट बलियाबाट खटिएको प्रहरी टोलीले शंकास्पद रुपमा बसिरहेका उनीहरुको शरीर जाँच गर्ने क्रममा गाँजा फेला परेको थियो । जेब्रा झोलामा लुकाइछिपाई राखेको ८ केजी गाँजा बरामद भएपछि उनीहरुलाई नियन्त्रणमा लिई इलाका प्रहरी कार्यालय बेलबारीबाट थप अनुसन्धान भइरहेको प्रहरीले जनाएको छ ।

खोटाङः खोटाङको वराहपोखरी गाउँपालिका वडा नम्बर ५ दूधकोशी नदीको बगरको खल्डोमा शंकास्पद अवस्थामा फेला परेकी वृद्धाको हत्या आरोपमा उनकै नाति पक्राउ परेका छन् ।

पक्राउ पर्नेमा झापाको गौरादह – ३ का २९ वर्षीय हरि भन्ने निरबहादुर खड्का रहेका छन् । प्रहरीका अनुसार बैशाख ३१ गते दूधकोशी नदी किनारमा सडेको अवस्थामा बेवारिशे शव फेला परेको थियो । सो शवको पहिचान तथा अनुसन्धान गर्ने क्रममा खोटाङको जन्तेढुंगा– ५ चिसापानी खुट्टा घर भई हाल इटहरी– १६ बालग्राममा डेरा गरी बस्ने ७७ वर्षीया तुलसा खड्काको भएको खुलेको थियो । शवको पहिचान भएसँगै हत्यामा संलग्न रहेका नाति निरबहादुरलाई प्रहरीले पक्राउ गरेको हो ।

हजुरआमाको हत्या गरी फरार रहेका खड्कालाई १ नम्बर प्रदेश प्रहरी कार्यालय विराटनगर र जिल्ला प्रहरी कार्यालय खोटाङबाट खटिएको प्रहरी टोलीले पक्राउ गरेको हो । उनलाई झापाको मेचीनगर नगरपालिका ६ काँकरभिट्टास्थित नेपाल– भारत सीमा क्षेत्रमा लुकेर बसेको बेला असार ८ गते बिहान पक्राउ गरेको प्रहरीले जनाएको छ ।

पक्राउ परेका खड्काले हजुरआमा तुलसालाई स्थानीय तहको निर्वाचनमा भोट हाल्न भनी बैशाख २६ गते इटहरी बालग्रामबाट चिसापानी खोटाङ लिएर गएको खुलेको छ । त्यस क्रममा बराहपोखरी– ५ स्थित दूधकोशी नदीको बगरमा हत्या गरी खाल्डोमा पुरेर उनी फरार भएको प्रारम्भिक अनुसन्धानबाट खुलेको प्रहरीको भनाइ छ ।

पक्राउ परेका खड्कालाई कर्तव्य ज्यानसम्बन्धी कसुरमा सम्मानित जिल्ला अदालत खोटाङबाट म्याद थप गरी थप अनुसन्धान भइरहेको जिल्ला प्रहरी कार्यालय खोटाङले जनाएको छ ।

दमकः आज बिहान साढे ५ बजे नेकपा एमालेका नेता तथा प्रदेश १ का पूर्वमन्त्री हिक्मत कार्कीको घर अगाडि प्रेसर कुकरजस्तो देखिने शंकास्पद वस्तु फेला परेको छ ।

कुकरमा तार बेरेर राखेको अवस्थामा भेटिएको शंकास्पद वस्तु निस्क्रिय पार्ने प्रयास हुँदैछ । आज बिहान अन्दाजी ४ बजे बत्ती नबाली आएको एउटा मोटरसाइकलमा चढेका व्यक्तिले शंकास्पद वस्तु राखेर गएको हुनसक्ने अनुमान गरिएको बताइएको छ ।