विराटचोकः आज दिउँसो १ बजे प्रथम सुन्दरहरैंचा प्रदेशस्तरीय फुटबल प्रतियोगिताको फाइनल खेल प्रस्तावित इन्द्रपुर रङ्गशालामा हुँदैछ । फाइनलमा आयोजक नेपाल मुस्लिम युवा समूह विराटचोक र भाङबारी फुटबल क्लब झापाबीच प्रतिष्पर्धा हुने भएको छ ।

आयोजकले सेमीफाइनलमा बलियो प्रतिद्वन्द्वी सशस्त्र प्रहरी बल पूर्वाञ्चललाई हराएको थियो भने झापाले वराह स्पोर्टिङ क्लब सुनसरीलाई हराएको थियो ।

यसैबीच, उपाधि हात पार्न खेलको रणनीति परिवर्तन गरिने आयोजकका टिम प्रशिक्षक मोहम्मद इब्राहिमले बताए । ‘खेलमा जीत र हार हुनु स्वाभाविक हो । विपक्षी टिमलाई कहिल्यै कमजोर ठान्नुहुँदैन’, निष्पक्ष खबरसँग कुराकानी गर्दै इब्राहिमले भने, ‘ए डिभिजन खेल खेल्ने खेलाडीको साथ प्रतिष्पर्धात्मक खेल खेल्ने हुनाले हामीले उपाधी जित्नेमा ढुक्क छौँ ।’

प्रतियोगिताको विजेताले नगद २ लाख रुपैयाँ र उपविजेताले नगद १ लाख रुपैयाँको साथमा ट्रफी पाउने आयोजक समूहका अध्यक्ष इफ्तखार आलम (राजा) ले बताए ।

यसैबीच, हिजो भएको मैत्रीपूर्ण खेलमा प्रतियोगिताको मुख्य प्रायोजक पीएलओ लुब्रिकेन्ट्स र उद्योग वाणिज्य सङ्घ कोशीहरैँचा दुवैले १–१ गोल गरेका थिए । मैत्रीपूर्ण खेल भएकाले प्रतियोगी टिमको आग्रहमा नै हारजीतको निर्णय नगरिएको खेल संयोजक तारिक अन्बरले बताए ।