विराटचोकः सुन्दरहरैंचाका ४ संस्थाको संयुक्त आयोजनामा ‘सकारात्मक चिन्तन र रचनात्मक जीवन’ विषयक जीवनोपयोगी उत्प्रेरक तालीम शुक्रबार सम्पन्न भएको छ ।

विराटचोकको नेपालीरिका होटलमा आयोजित कार्यक्रममा सुन्दरहरैँचाका विभिन्न क्षेत्रका ३ सयभन्दा बढीको उत्साहपूर्ण सहभागिता रहेको थियो । भारतको हरिद्वारस्थित देव संस्कृत विश्वविद्यालयबाट योग विज्ञान एवम् मानव चेतनामा विद्यावारिधि गरेका डा. राजु अधिकारीले सहभागीलाई आफ्ना अनुभव र उत्प्रेरक भनाइका माध्यमबाट ऊर्जा भर्ने काम गरेका थिए ।

मानिसको अति व्यस्तताका कारण जीवनशैली नै अस्तव्यस्त बनेको शहरवासीलाई खानपान, व्यायाम, अध्यात्म, प्राणायाम र योगसमेत उनले सिकाएका छन् । जीवनलाई प्रकृति, स्वास्थ्य र सौन्दर्यसँग जोड्ने कलाका बारेमा उनले सहभागीलाई जानकारी गराएका थिए ।

सुन्दरहरैंचा उद्योग वाणिज्य संघ, पाथीभरा स्वतन्त्र महिला समाज, इन्द्रपुर जेसीज तथा लायन्स क्लब अफ इन्द्रपुरको संयुक्त आयोजनामा तालीम आयोजना गरिएको थियो ।

उद्योगपति भोलेश्वर दुलालले देशमा भएको आर्थिक मन्दीका कारण व्यवसायमा पर्न गएको थप पीडा र तनावबाट मुक्त गर्न यो कार्यक्रम राखिएको बताए । बैंकको चर्को ब्याजका कारण व्यवसायीको मनोबल गिर्न नदिन यस्ता किसिमको कार्यक्रमले सकारात्मक ऊर्जा दिने र प्रोत्साहन मिल्ने बताए ।

सुन्दरहरैंचाका निवर्तमान नगरप्रमुख शिवप्रसाद ढकालले मानव स्वभावले नै महत्वाकांक्षी भएको र अनावश्यक महत्वकांक्षा कम गर्न तथा चिन्ता होइन चिन्तन गर्न र संयमता अपनाउन यस्ता तालीमले उत्प्रेरणा दिने बताए ।

कार्यक्रममा बिभिन्न संघसंस्थाका प्रतिनिधिको उपस्थिति रहेको थियो । प्रयोगात्मक सीप सिकाउन, सकारात्मक सोचको विकास गर्न, आत्मविश्वासी बन्न आकर्षित गर्न र क्षमता अभिवृद्धिका विविध पक्षहरुलाई अनुकूल माध्यम अपनाएर अघि बढ्न तालिमबाट सहभागीलाई ऊर्जा मिलेको सहभागीले बताए ।

सुन्दरहरैंचा उद्योग वाणिज्य संघका अध्यक्ष कृष्णप्रसाद रिजालको सभापतित्वमा भएको कार्यक्रमको संयोजन पाथीभरा स्वतन्त्र महिला समाजकी संस्थापक अध्यक्ष प्रमिला दुलालले गरेकी थिइन् ।