विराटचोकः प्रदेश नम्बर १ का सामाजिक विकास मन्त्री बुद्धिकुमार राजभण्डारीले स्काउटको मूल्यमान्यतालाई पछ्याउँदै राजनीतिकर्मी अघि बढेमा २० वर्षमा देशको मुहार फेरिने बताएका छन् । मोरङको सुन्दरहरैंचामा आयोजित स्काउटरहरुको संयुक्त ट्रेनिङ क्याम्पको उद्घाटन गर्दै उनले यस्तो बताएका हुन् ।

कुमालेले माटोबाट सुन्दर भाँडा बनाएजस्तो व्यक्तिलाई नैतिकवान र चरित्रवान बनाउन स्काउटले मुख्य भूमिका खेल्ने बताए । भ्रष्टाचार अन्त्य गरी सदाचार जीवन जिउने कला स्काउटले सिकाउने हुनाले सभ्य समाज निर्माणमा स्काउटरहरुको भूमिका महत्वपूर्ण हुने उनको भनाइ थियो ।

स्काउटमा राजनीति छिरेकोमा दुःख लागेको बताउँदै त्यस्तो हुनु दुर्भाग्यपूर्ण भएको उनले बताए । सहयोगी भावना भएको स्काउट अभियानको छवि मैल्याएर राजनीति गर्न खोज्नेलाई चिनेर त्यस्ता चरित्रबाट टाढा हुने प्रयास स्काउटरहरुले गर्नुपर्ने उनको भनाइ थियो ।

आफ्नो पालामा स्काउट अभियान पहिलेको भन्दा झन् फैलिने उनले उल्लेख गरे । त्यसको लागि विगतमा भन्दा बढी बजेट विनियोजन गर्ने प्रतिबद्धता मन्त्री राजभण्डारीले व्यक्त गरे ।

मोरङको सुन्दरहरैंचा, बेलबारी, पथरी, उर्लाबारी, केराबारी र लेटाङका स्काउट तदर्थ समितिको आयोजनामा भएको संयुक्त ट्रेनिङ क्याम्पमा गण्डकी र सुदूर पश्चिम प्रदेशका स्काउटर पनि सहभागी छन् । ४७ विद्यालयका १ हजार ३ सय विद्यार्थी क्याम्पमा सहभागी भएको स्वागत मन्तव्य व्यक्त गर्दै संयुक्त ट्रेनिङ क्याम्पका संयोजक बादल देवानले बताए ।

नेपाल स्काउटका प्रदेश संयोजक रवि खनालले प्रदेशका सबै पालिकामा स्काउटरहरु उत्पादन गर्न आफूहरु लागि परिरहेको बताए ।

स्काउटका केन्द्रीय समिति निर्देशक रामप्रसाद भट्टराईले पनि स्थानीय सरकारले स्काउटको विकासमा ध्यान दिनुपर्नेमा जोड दिए ।

स्काउटका राष्ट्रिय संयोजक लोकबहादुर भण्डारीले ‘एक घर एक स्काउट’ को अभियान नै चलाउनुपर्नेमा जोड दिए । स्काउटरहरुलाई पूर्ण तालीम दिन सके देशमा सुशासन कायम हुने बताउँदै नैतिक शिक्षा पाएमा विद्यार्थी आफैँ सामाजिक कार्यमा अग्रसर हुन उत्प्रेरित हुनेमा उनले जोड दिए ।

सुन्दरहरैंचा नगरपालिकाका प्रमुख केदारप्रसाद गुरागाईँले व्यक्तिमा अन्तरनिहीत क्षमताको विकास गर्नमा स्काउटको भूमिका महत्वपूर्ण हुने बताए । पालिका प्रमुखलाई स्थानीय स्काउटको संरक्षक र उपप्रमुखलाई प्रमुख स्काउटर बनाएर कानुनी र नैतिक रुपले जनप्रतिनिधिलाई उत्तरदायी बनाउनु स्काउट अभियानको लागि सुखद पक्ष भएको उनले उल्लेख गरे ।

संयुक्त ट्रेनिङ क्याम्पको उद्घाटनको औपचारिक कार्यक्रम समापनपछि आयोजकले अतिथिहरुलाई क्याम्पका विभिन्न इभेन्ट क्षेत्रको अवलोकन गराएको थियो ।
ट्रेनिङ क्याम्प ९ गतेसम्म सञ्चालन हुने आयोजकले जनाएको छ ।