विराटचोकः केराबारी–३ की चमेली राईले आफ्नी २० वर्षीया छोरी किसला राई १८ महिनाकी नातिनी जस्टिनासहित हराएको भन्दै उनीहरुको खोजी गरिदिन सम्बन्धित सबैसँग अनुरोध गरेकी छिन् ।

भोजपुरको षडानन्द नगरपालिकाका सिंहबहादुर तामाङसँग विवाह गरेकी छोरी किसला सुनसरीको इटहरीबाट केराबारी जान्छु भनेर हिँडे पनि घर नपुगेको चमेलीले बताइन् । इटहरीमा माइजूको घरमा गएर फर्किने क्रममा उनी हराएकाले छोरी र नातिनी खोजीपाऊँ भनेर इलाका प्रहरी कार्यालय इटहरीमा आइतबार जाहेरी दिएको उनले बताइन् ।

शनिबार इटहरीबाट हिँडेकी छोरीले १२ बजे दिउँसो आइपुग्छु भनेर भनेको तर घरमा नआएपछि दिउँसो साढे ३ बजेतिर फोन गर्दा मोबाइल स्वीच अफ भएको हुनाले जङ्गलमा फोन नलागेको होला भन्ने अनुमान गरेको उनले बताइन् । बेलुका ४ बजेपछि आमा तपाईँलाई सुखमा राख्न सकिनँ, म टाढा जाँदैछु, मलाई नखोज्नू मैले अर्काे बिहे गरेँ भनेर छोरीले म्यासेज पठाएको उनले रुँदै सुनाइन् ।

छोरीले अर्काे बिहे गरी भन्ने आफूलाई नलागेको उनको भनाइ छ । छोरी अपहरणमा परेको हुन सक्ने र त्यस्तो एसएमएस लेख्न लगाएको हुन सक्ने बताउँदै छोरी ज्वाइँमा त्यस्तो मनमुटाव भएको थाहा नभएको तर गत शुक्रबार सामान्य विवाद भएपछि माइजूकोमा इटहरी जान्छु भनेर छोरी हिँडेकी उनको भनाइ छ ।

इटहरीमा रहेको ग्लोबल ओरियन्समा काम गर्ने छोरी धेरैजसो इटहरीमा होस्टलमा बस्ने गरेको र कहिलेकाहीँ माइजूकोमा जाने गरेको चमेली बताउँछिन् । ज्वाइँ सिंहबहादुर भने ससुरालीमा बसेर लेबर काम गर्ने गरेको र छोरीको खोजतलासमा ज्वाइँसासू हिँडिरहेको उनले सुनाइन् । अरु दिन नातिनी माइतमै छोड्ने गरे पनि त्यो दिन चाहिँ नातिनी लिएर छोरी इटहरी गएकी र फर्किने क्रममा बेपत्ता भएकी उनले बताइन् ।

सबैतिर सोधखोज गर्दा पनि पत्ता नलागेपछि प्रहरीलाई जानकारी गराएको उनले बताइन् । छोरी दोस्रो बिहे गर्ने स्वभावकी आफूले नपाएको र दोस्रो बिहे गरेको जानकारी पनि म्यासेजमार्फत् मात्रै दिएकाले त्यो म्यासेज छोरीले नपठाई अरु कसैले छोरीको मोबाइलबाट पठाएको हुन सक्ने आफ्नो अनुमान रहेको उनी बताउँछिन् ।