विराटचोकः सुन्दरहरैंचा नगरपालिका वडा नम्बर ७ को आयोजनामा भएको जुत्ताचप्पल बनाउने तालीम शुक्रबार समापन भएको छ । तालीममा १४ जना प्रशिक्षार्थीले तालीम लिएका थिए ।

कार्यक्रमलाई प्रमुख अतिथिको आसनबाट सम्बोधन गर्दै सुन्दरहरैंचा नगरपालिकाकी उपप्रमुख धनमाया तामाङले प्रशिक्षार्थीले व्यवसायी बन्छु भनेर अघि बढ्नुपर्ने बताइन् । आफूलाई आर्थिक अभाव र इच्छाशक्ति भएमा छिटो व्यवसायी बन्न सहयोग पुग्ने उनको भनाइ थियो ।

‘सीपको सदुपयोग गर्नुपर्छ’, उनले भनिन्, ‘वडा कार्यालयमा गएर आफूलाई आवश्यक परेको तालीम र आवश्यक औजार प्रदान गर्न झक्झक्याउनुहोस् । स्थानीय सरकार तपाईंहरुको साथमा छ । नगरवासीलाई आयमूलक काममा लाग्न र व्यवसायी बनाउन हामी आवश्यक सहयोग गर्न तयार छौँ ।’

वडा नम्बर ७ का अध्यक्ष चैतन्यप्रसाद सिटौलाले आधारभूत तालीम लिएका प्रशिक्षार्थीले सामुहिक प्रतिबद्धता जनाई तालीमको माग गरेमा थप तालीम दिन सकिने बताए । चालु आर्थिक वर्षमा चालु खर्च कटाएर बाँकी रहेको रकमको २० प्रतिशत रकम सामाजिक क्षेत्रमा विनियोजन गरेको उनको भनाइ थियो । महिलाको नाममा उद्योग दर्ता गर्दा ५० प्रतिशत राजस्व छुट हुने हुनाले त्यसको सदुपयोग गर्नुपर्ने उनले बताए ।

नगर कार्यपालिका सदस्य तारा घिमिरेले प्रत्येक वडामा सीप विकाससम्बन्धी तालीम भइरहेको तर तालीम सकिएपछि कति प्रशिक्षार्थी व्यावसायिक बने भनेर अनुगमन भने नभएको बताइन् । तालीमपछि व्यावसायिक हुनेको अभिलेख राख्न सकेमा तालीमको उपलब्धिको बारेमा जानकारी हुने उनको भनाइ थियो ।

वडा सदस्य मीना ओझाले सिलाइकटाइ व्यवसाय गर्नेले यो व्यवसायलाई पनि थप गर्न सक्ने बताइन् । वडाले थप तालीमको लागि सहयोग गर्न सक्ने पनि उनले सङ्केत गरेकी थिइन् ।

समाजसेवी गोकुल न्यौपानेले तालीमपछि प्रमाणपत्र सिरानी हाल्ने अनि फेरि चुलोचौकोमै सीमित हुने परिपाटीको अन्त्य गर्नुपर्ने बताए । नेपालभर नमूना व्यवसाय गर्ने गरी सामुहिक रुपमा व्यवसाय गर्न उनले सुझाव दिए ।

प्रशिक्षक मन्दिरा खड्का कार्कीले पढाइभन्दा सीपको बढी महत्व हुने बताइन् । पढाइपछि जागिर खान चाकरी गर्नुपरे पनि सीप सिकेको मानिसले व्यवसाय गरेर वा प्रशिक्षक भएर आय आर्जन गर्न सक्ने बताइन् । आफूबाट प्रशिक्षितमध्ये धेरै जना प्रशिक्षक नै भइसकेको उनले सो अवसरमा उल्लेख गरिन् ।

प्रशिक्षार्थी सरस्वती दाहालले व्यावसायिक बन्न इच्छुकहरुले सामुहिक व्यवसाय गर्ने बताइन् । कार्यक्रममा वडा सदस्य विष्णुप्रसाद घिमिरे र भुवनसिंह मगर तथा वडा सचिव कृष्णबहादुर दाहालको पनि उपस्थिति थियो । कार्यक्रम तालीम आयोजक संस्था पकली टेक्नोलोजी इन्स्टिच्युटका निर्देशक बलराम दाहालले सञ्चालन गरेका थिए ।