विराटचोकः इन्द्रपुर जेसीजको आयोजनामा रक्तदान कार्यक्रम भएको छ । मोरङको सुन्दरहरैंचा नगरपालिकास्थित विराटचोक बजारमा खुला रक्तदान सम्पन्न भएको हो ।

नेपाल रेडक्रस सोसाइटी विराटनगरको प्राविधिक सहयोगमा भएको रक्तदानमा ५६ जनाले रक्तदान गरेका छन् । सामाजिक कार्य अन्तर्गत जेसीजले प्रत्येक वर्ष रक्तदान गर्दै आइरहेको र त्यसै अनुरूप रक्तदान कार्यक्रमको आयोजना गरिएको वर्ष २०२० का अध्यक्ष गणेशप्रसाद भट्टराईले बताए । अध्यक्ष भट्टराईले मानिसको बाँच्ने अधिकार भए पनि रगत अभावकै कारण कसैको मृत्यु नहोस् भन्ने हेतुले सो कार्यक्रम आयोजना गरिएको बताए ।

रक्तदान कार्यक्रममा प्रमुख अतिथि सुकुना बहुमुखी क्याम्पसका क्याम्पस प्रमुख चन्द्रमणि राई रहेका थिए । प्रमुख राईले कार्यक्रममा बोल्दै जेसीज अन्तर्राष्ट्रिय संस्था भएकाले हरेक ठाउँमा मानवताको काम गर्दै आएको बताए । यस्तै राईले देशका यस्ता संस्था सरकारको आँखा नपुगेको ठाउँमा पुग्ने गरेको बताए । रगतले कुनै जात, समाज, वर्ग, समुदाय, नछुट्याउने भएकाले यसले सामाजिक सद्भाव कायम गर्ने हुनाले पवित्रकार्य भएको उनको भनाइ थियो ।

कार्यक्रममा कोशीहरैंचा उद्योग वाणिज्य संङ्घका अध्यक्ष नवराज चापागाई, इन्द्रपुर साना शहरी खानेपानी उपभोक्ता समितिका अध्यक्ष केदारप्रसाद गुरागाई, पाथीभरा महिला समाजकी अध्यक्ष प्रमिला दुलाल, इन्द्रपुर जेसीजका पूर्व अध्यक्षहरू, मानार्थ सदस्यलगायतको कार्यक्रममा उपस्थिति थियो ।

कार्यक्रमलाई सम्बोधन गर्दै उद्योग वाणिज्य सङ्घका अध्यक्ष चापागाईले कयौँ पटक ताजा रगत चाहिने भएकाले ४० वर्ष उमेर मुनिका युवाले अभाव हुने समूहको रगतको बचत गर्नुपर्ने बताएका थिए । यस्तै रक्तदान गरिएको रगत यो क्षेत्रका बिरामीले सजिलै प्राप्त गर्ने वातावरण आयोजक संस्थाले मिलाइदिनुपर्ने धारणा व्यक्त गरेका थिए ।

कार्यक्रम इन्द्रपुर जेसीजका स्वास्थ्य संयोजक बिना सुवेदी आचार्यको संयोजनमा भएको थियो । कार्यक्रमको सञ्ंचालन इन्द्रपुर जेसीजका उपाध्यक्ष समीर बस्नेतले गरेका थिए ।