माघको अन्तिम साता तिर काम विशेषले कमल सरलाई भेट्न मकालु टेलिभिजन गएको थिएँ, सर ज्वरो आएर अफिसमा नगइ घरमै बस्नु भएको रहेछ । त्यसपछि मीत्र रोहित जी र म घरमै गयौं । त्यस्तै १० मिनेट जति गफगाफ गरेर काम सकेर विदा भएका थियौं । सरसँग भेट भएको ५,७ दिनपछि नै सरलाई ब्लड क्यान्सर भएको खबर थाहा पाउँदा त्यतिबेला म अवाक भएँ । सरको स्वास्थ्य लाभको कामना गर्नु बाहेक न बोल्ने नत लेख्ने कुनै शब्दै भेटिन ।
भर्खरै अनलाइन खबरमा सरले लेख्नु भएको बकपत्रले अझ भावुक बनायो । मकालु टेलिभिजनको समाचार प्रमुख भएर काम गरिरहँदा सरले दुःख पाएका, विरामी भएर उपचार नपाएका धेरै पात्रहरुलाई समाचारमा समेट्नु भयो । तपाईंको डाक्टर कार्यक्रम मार्फत स्वास्थ्य सचेतना फैलाउनुभयो । तर विडम्बना यतिबेला उहाँ स्वयम् गंभीर रोगसँग जुधिरहनु भएको छ । अनि भगवातप्रति अति निष्ठा राख्ने कलम सरलाई नै व्लड क्यान्सर जस्तो रोग लागेकोमा सरले भगवान प्रति गुनासो गर्नुपर्ने अवस्था आएको छ । कमल सरको शीघ्र स्वास्थ्य लाभको कामना गर्दै २,४ शब्द कोर्न मन लाग्यो ।

मकालु टेलिभिजनको समाचार शाखामा ४ वर्षसम्म रहेर तपाईंसँग बिताएका क्षणहरु अझै ताजै छन् सर । सरले मकालु टेलिभिजनमा तपाईंको डाक्टर कार्यक्रममा दर्जनौं डाक्टरको अन्तरवार्ता लिएर कयौं मनिसलाई स्वास्थ्य समस्या सुल्झाउन सघाउनु भयो । साथै अन्य आफन्त, साथीभाई लगायतलाई विना कुनै स्वार्थ डाक्टरको झैं परामर्श(कुन रोगको उपचार कुन अस्पतालमा राम्रो हुन्छ, कुन डाक्टरलाई भेट्दा ठीक हुन्छ आदि) दिएर सहयोग गर्दै आउनु भयो । धेरैलाई फलानो डक्टरलाई भन्देको छु जाँच फिस लाग्दैन, औषधीको मात्र पैसा तिरे पुग्छ, भन्दै सहयोग गरिरहनुभयो । म स्वयमलाई पनि सरले यो गुन लगाउनु भएको छ । साथै आर्थिक अवस्थाका कारण उपचारमा समस्या भएका, बेसाहारा तथा विपन्नताका कारण पढ्न नपाएकाहरुका समाचारहरु सँधै सरको प्राथमिकतामा हुन्थे । यस्ता धेरै समाचारहरुलाई सरले मकालु समाचारको क्यूसिटमा हेडलाइन बनाउनु भयो । तपाईंले यस्ता समाचारहरुलाई प्राथमिकताका साथ टेलिभिजनमार्फत प्रशारण गराई तथा संवाददाताहरुलाई त्यस्ता समाचार संकलनमा उत्प्रेरित गरि पीडितका लागि आर्थिक संकलन गराई सहयोग गर्दै आउनु भयो । जसका कारण धेरैले नयाँ जीवन पाए । तर यतिका सहयोगी तथा मिलनशार स्वभाव र सादा जीवनका पर्यायवाची तपाईं यतिबेला स्वयम् ब्लड क्यान्सर जस्तो रोगसँग जुध्नु परिरहेको छ । साथै उपचारका लागि लाग्ने ४० लाख रकम जुटाउन सहयोगको याचना गरिरहनु परेको छ ।
हामी सबैलाई थाहा छ सर, जीवनमा समस्या त कहिले काहीं आउँछन् नै, जीवन सुख र दुःखको संगम हुँदै हो । तपाइँ जस्तो सादगी र धर्मप्रति निष्ठावान व्यक्तिलाई व्लड क्यान्सर त के अझै ठूला ठूला समस्याबाट समेत भगवानले पार लाउनु हुनेछ । त्यसैले तपाईंले वकपत्रमा भनेझैं भगवान निष्ठूरी बन्नु भएको होइन । सायद भगवानलाई पनि आफूप्रति निष्ठावान, धार्मिक तथा अध्यात्मिक व्यक्तिहरुलाई जस्तो सुकै संकट आएपनि पार लगाउने म छु भनेर प्रमाणित गराउनु छ क्यार ।
तपाईंले निष्ठापूर्वक पूज्दै आउनु भएका भगवानको कृपा, पत्रकारिताबाट सरले कमाउनु भएका मीत्रजन तथा शुभेच्छुकहरुको सहयोग र शुभेच्छा अनि चिकित्सा विज्ञानको उपचार पद्धतीबाट तपाईंले अवश्य नयाँ जीवन पाउनु हुनेछ सर । अनि बकपत्रमा भने झैं तपाई क्यान्सरलाई जितेर फेरि पत्रकारितामा फर्कनु हुनेछ । म हिजो(शुक्रबार) मात्रै मकालु टेलिभिजन पुगेको थिएँ । मकालु टेलिभिजनको समाचार कक्षले तपाईंलाई पर्खिरहेको छ । अनि म मेरो मोवाइल फोनमा “कमल सर कलिङ” लेखेको डिस्प्ले हेर्न आतुर छु । “रेवती इटहरीबाट के पठाउँछौ आज”, यो आवाज मलाई अझै सुन्नुछ सर ।
केही समय अवश्य लाग्ला, तर तपाईंले सिभिल अस्पतालको बेड नम्बर २३८ बाट विदा भएर मकालु टेलिभिजनको समाचारलाई सम्हाल्नु नै हुनेछ । तपाईंले अझ धेरै दिनदुःखीहरुको घाउमा मलम लगाउनु छ सर, फेरि पनि “तपाईंको डाक्टर” कार्यक्रममा मार्फत धेरै विरामीहरुलाई सहयोग पुर्याउनु छ । उनीहरुका लागि पनि तपाईंले क्यान्सरलाई जित्नै पर्छ । तपाईंलाई थाहै छ नी सर आत्मबलले आधा रोग निको गराउँछ । त्यसैले आत्मबल दह्रो बनाउनुहोस् । हामी सँधै तपाईंको साथमा छौं । सर हजूरको शीघ्र स्वास्थ्य लाभको कामना ।