धरानः २ साउन २०३९ मा पिता रवीन्द्रप्रसाद भण्डारी र माता राधादेवी भण्डारीको कोखबाट इटहरी–८ सुनसरीमा जन्मिएकी मञ्जु भण्डारीको राजनीति पनि इटहरीबाट नै शुरु भएको थियो ।
जनता मावि इटहरीमा २०५३ सालमा कक्षा ८ मा पढ्दादेखि नै उनी अनेरास्ववियुको विद्यालय प्रारम्भिक कमिटी सदस्य भएकी थिइन् । त्यसपछि सो कमिटीको कोषाध्यक्ष हुँदै अध्यक्षसम्म बनेकी थिइन् । जनता बहुमुखी क्याम्पसमा अध्ययनरत हुँदा २०५६ सालमा सुनसरी २ नं क्षेत्रीय कमिटी सचिव बनेकी थिइन् उनी । त्यसपछि सो र्सगठनको कोशी अञ्चल कमिटी अध्यक्ष हुनुको साथै २ कार्यकाल अनेरास्ववियु केन्द्रीय सदस्य समेत भएकी थिइन् । २०५८ सालमा अनेरास्ववियुको कमिटी निर्माणका क्रममा उनी सैनिकबाट गिरफ्तारीमा समेत परेकी थिइन् ।
पुनः २०६१ सालमा इटहरीबाट सैनिक सुराकीमा गिरफ्तार भई जिल्ला प्रहरी कार्यालयमा थुनामा परिन् । तत्कालीन राजा ज्ञानेन्द्रले गराएको नगर निर्वाचन बहिष्कारका क्रममा गिरफ्तारीमा परी १३ दिन सशस्त्र प्रहरी क्याम्प पकली हिरासतमा समेत बसेकी थिइन् ।
गत स्थानीय तहको निर्वाचनमा ३५ वर्षको उमेरमा नै धरानको उपमेयर बन्न सफल भएकी उनी राजनीतिक रूपमा मात्र होइन, सामाजिक अभियन्ताको रूपमा समेत सक्रिय भइन् । मानव अधिकार तथा द्वन्द्व रूपान्तरणमा केही समय काम गर्नुको साथै द्वन्द्व व्यवस्थापनका लागि सञ्चालित बारुदी सुुरुङ प्रतिबन्ध अभियानको जिल्ला संयोजक तथा लैङ्गिक मैत्री योजना निर्माण र कार्यान्वयनको संयोजनकर्ता भई काम गरेकी थिइन् । महिला तथा बालिकाको न्यायमा पहुँच परियोजना अन्तर्गत जिल्ला संयोजक भएर पनि उनले काम गरेकी थिइन् ।
२०७४ सालको स्थानीय तह निर्वाचनमा धरान उपमहानगर पालिकाको उपप्रमुखमा २१ हजार २ सय ५६ मत ल्याएर निर्वाचित उनी तत्कालीन मेयर तारा सुब्बाको निधन भएपछि २०७५ साउनदेखि २०७६ मङ्सिरसम्म कार्यवाहक नगर प्रमुखको रुपमा रहेकी थिइन् ।
नेकपा एमाले केन्द्रीय कमिटी सदस्य, नेकपा एमाले सुनसरी जिल्ला सह इन्चार्ज, अनेम सङ्घ सुनसरी जिल्ला अध्यक्ष एवम् अनेम सङ्घ केन्द्रीय सदस्यमा रही उनले पार्टीगत जिम्मेवारी बहन गरेकी छिन् ।
लालकिल्ला तोड्ने आशमा उम्मेद्वार बनेका हेमकर्ण पौडेल (उम्मेद्वार परिचय ५)
पद, प्रलोभन र अवसरबाट टाढै रहेका आइन्द्रविक्रम बेघा (उम्मेद्वार परिचय ४)
युवा पुस्ताको मत पाउने आशमा केराबारीका तिलक थापामगर (उम्मेद्वार परिचय ३)
अघिल्लो निर्वाचनको परिणाम उल्ट्याउने दौडमा जितेन्द्र रुम्दाली (उम्मेद्वार परिचय २)
तेस्रो पटक जनप्रतिनिधि बन्न आतुर दीपक बुढाथोकी (उम्मेद्वार परिचय १)
You must be logged in to post a comment Login