विराटचोकः कोरोना भाइरसको सङ्क्रमण विश्वका २ सयभन्दा बढी देशमा फैलिएको छ । सो भाइरसको सङ्क्रमणका कारण १ लाख ३ हजारभन्दा बढीले ज्यान गुमाइसकेका छन् । ३ लाख ४३ हजारभन्दा बढी मानिस निको भएर फर्किएका छन् । भाइरस फैलिएसँगै विश्वभरका मानिसमा एक किसिमको त्रास उत्पन्न भएको छ । भाइरसको सङ्क्रमण रोकथाम गर्न यतिखेर विश्वका धेरै देशमा लकडाउन, निषेधाज्ञा र कर्फ्यु लगाइएको छ । यसै क्रममा विभिन्न सिलसिलामा विदेशमा रहेका नेपालीसँग सामाजिक सञ्जालमा गरिएको कुराकानीमा आधारित रहेर यो सामग्री तयार पारिएको छ ।

मार्च १४ देखि लकडाउन जारी छ
विनोद ढकाल, चेक रिपब्लिक

झापाको दमक घर भएका विनोद ढकाल ४ वर्ष अघिदेखि युरोपियन मुलुक चेक रिपब्लिकमा बस्दै आएका छन् । पोल्याण्ड, जर्मनी, स्लोभाक, हंगेरीलगायतका मुलुकबाट घेरिएको भूपरिवेष्ठित देश चेक रिपब्लिकमा लकडाउन मार्च १४ देखि शुरु भएको हो ।

त्यहाँ ५ हजारभन्दा बढी मानिस कोरोनाबाट संक्रमित भए पनि नेपालीहरू भने कसैमा पनि कोरोनाको संक्रमण भेटिएको छैन । त्यहाँ सत्ता पक्ष र विपक्षीबीच संकटको समयमा कसरी अघि बढ्ने भन्ने बारेमा संवाद भइरहेको छ ।
मानिसको जमघट हुने रेष्टुरेन्ट, बार, सपिङ मल सबै बन्द छन् । लिडल अल्बट भनिने खाद्यवस्तु वितरणको सेवा गर्ने (फुड सप्लाई गर्ने) सुपर मार्केट खुला छन् । पञ्जा र सेनिटाइजरको अधिक प्रयोग हुने गरेको छ । बिहान १० देखि १२ बजेसम्म ज्येष्ठ नागरिक (सिनियर सिटिजन) बजारमा गएर आफ्नो लागि सामान किन्छन् । सिनियर सिटिजन भन्नाले ६० वर्षभन्दा माथिका व्यक्तिलाई बुझिन्छ । बाँकी मानिस १२ बजेभन्दा पछि बजारमा निस्कन्छन् । तयारी खानाको लागि अनलाइन अर्डर गर्नुपर्छ ।  चेक रिपब्लिकमा ८ सय भन्दा बढी नेपाली रहेका छन् ।

आपत्काल घोषणा गरिए पनि पूर्ण लकडाउन छैन
फाल्गुनराज नेपाल, जापान

जापानमा ७ ओटा प्रान्तमा आपत्काल घोषणा गरिएको छ । आपत्काल घोषणा गरिए पनि आंशिक लकडाउन छ । मानिसहरूलाई सचेत रहन आग्रह गरिएको छ । तर घरबाहिर निस्कन रोकावट हुँदैन ।

जापानमा प्रत्येक दिन ५ सय जनाको दरले संक्रमित थपिइरहेका छन् । १ करोड २० लाख जनसंख्या भएको टोकियो शहरमा अझै पनि मानिसलाई हिँडडुलमा पूर्ण बन्देज लग(ाइएको छैन ।

पहिलेदेखि नै पब्लिक गाडीमा कमै मानिस चढ्थे । टे«नमा बढी मानिस चढ्ने गर्थे । अहिले पनि बिहान बेलुका ट्रेनमा मानिस धेरै हुन्छन् भने दिउँसो चाहिँ खाली नै हुन्छन् । टोकियोमा चहलपहल कायमै छ । अधिकांश उद्योग सञ्चालनमा छन् । 

मानिसको धेरै भीड हुने रेष्टुराँ, होटल, डान्स बार, सैलुन आदि बन्द गर्न आह्वान गरिएको छ । मानिसहरू मास्क लगाएर हिँडिरहेका भेटिन्छन् । कोरोना संक्रमणका वास्ता नगर्ने जापानी पनि भेटिन्छन् । नेपालीहरू भने अलि चिन्तित देखिन्छन् । डर हुँदाहुँदै पनि विद्यार्थीहरू भने पार्ट टाइम काममा गइरहेका हुन्छन् ।

एनआरएनले हेल्प डेस्क राखेर नेपालीलाई सहयोग गरिरहेको छ
सुवर्ण पराजुली, अस्ट्रेलिया

अस्ट्रेलियामा आंशिक लकडाउन छ । तर रेस्टुरेन्ट भने खुला छन् । रेस्टुरेन्ट खुला भए पनि त्यहीँ बसेर खान भने पाइँदैन । अनलाइन अर्डर गरेर मगाउनुपर्छ ।

लकडाउन भए पनि हिँड्न मिल्छ तर २ जनाभन्दा बढी हिँड्न भने पाइँदैन । २ जनाभन्दा बढी हिँडेमा ११ हजार डलरभन्दा बढी जरिवाना तिर्नुपर्छ । जिमखाना र क्लब सबै बन्द छन् ।

नागरिकता र पिआर भएकालाई सरकारले २\२ हप्तामा १ हजार ५ सय डलर दिने भनेको छ । तर विद्यार्थीले सो सुविधा नपाउने हुनाले नेपाली विद्यार्थीलाई गाह्रो छ । नर्सिङ होम र सुपर मार्केटजस्ता अत्यावश्यक सेवा दिने ठाउँमा काम गर्ने मानिस काममा गइरहेका छन् । अरु ७०\८० प्रतिशत विद्यार्थीले चाहिँ काम गर्न पाएका छैनन् ।

गैरआवासीय नेपाली संघ एनआरएनले हेल्प डेस्क राखेको छ । सोही डेस्कमार्फत् नेपाली विद्यार्थीलाई सहयोग गरिरहेको छ । भर्खर आएका विद्यार्थीलाई धेरै समस्या भएको छ । उनीहरूले यहाँको परिवेश बुझ्नै पाएका हुँदैनन् । व्यक्तिगत रूपमा पनि विद्यार्थीलाई सहयोग गर्ने काम भइरहेको छ ।

विदेशमा रहेका नेपालीको लकडाउन अनुभव (शृङ्खला ६)

लेखक, साहित्यकारको लकडाउन अनुभव (शृङ्खला ५)

विदेशमा रहेका नेपालीको कोरोना कहर (शृङ्खला ४)

विदेशमा रहेका नेपालीको कोरोना कहर (शृङ्खला ३)

लकडाउनको समयमा विदेशमा रहेका नेपालीको अवस्था (शृङ्खला २)

कोरोनाको बारेमा यसो भन्छन् विदेशमा रहेका नेपाली (शृङ्खला १)