विराटचोकः माघ महिनामा सुन्दरहरैंचाको विराटचोक र सलकपुर क्षेत्रमा सम्साँझै केही व्यक्तिमाथि लुटपाट भयो । बाटोमा हिँडिरहेका मानिसको पैसा भएको ब्याग लुटेर भाग्ने गरेको एकै प्रकृतिका ती घटनामा संलग्न सबै व्यक्ति मोटरसाइकलमा आएको पीडितको भनाइ छ ।

एउटा घटना त सशस्त्र प्रहरीको क्याम्पकै अगाडि भएको घटना बाहिर आयो । यी सब घटनाले सुन्दरहरैंचाको सुरक्षा स्थिति कमजोर भएको र मुख्य बजार र राजमार्ग क्षेत्रमै साँझको समयमा लुटपाट हुने गरेको भन्दै नगरवासीले प्रशासनको आलोचना पनि गरे । नगर क्षेत्रमा राखेका सिसी क्यामेरा बिग्रिएका हुनाले ती घटनामा संलग्नको खोजी गर्न अप्ठ्यारो भएको प्रहरीले बताएको थियो ।

अब भने यस्ता आपराधिक क्रियाकलापमा कमी ल्याउन र शान्ति सुरक्षाको स्थिति मजबुत बनाउन भनी नगरपालिकाले मुख्य बजारमा शक्तिशाली सीसी क्यामेरा जडान गर्ने भएको छ । राति पनि भिडियो खिच्न सक्ने क्षमताका ती क्यामेरा मुख्य बजारमा राखिने नगरप्रमुख शिवप्रसाद ढकालको भनाइ छ । साथै पुराना सीसी क्यामेराको मर्मत गरी पुनः प्रयोग गरिने र ती क्यामेराको निगरानी प्रहरीमार्फत् हुने उनले जनाए ।

नगरको सुरक्षा व्यवस्थालाई थप मजबुत बनाउन म्यादी प्रहरी भर्ना गरिने प्रमुख ढकालको भनाइ छ । यसअघि म्यादी प्रहरी भर्नाको लागि खुलाइएको आवेदनमा प्राविधिक त्रुटि भएकाले त्यसलाई रद्द गर्नुपरेको बताउँदै सबै प्रक्रिया पूरा गरेर म्यादी प्रहरी भर्ना गर्ने तयारी भइरहेको पनि उनले जानकारी दिए ।

सम्बन्धित समाचारहरुः

सुन्दरहरैंचाले ९० वर्षमाथिका ज्येष्ठ नागरिकलाई मासिक १ हजार रुपैयाँ भत्ता दिने (नगर स्थापना दिवस विशेष ६)

स्वास्थ्यको क्षेत्रमा यसरी अघि बढ्दैछ सुन्दरहरैंचा नगरपालिका (नगर स्थापना दिवस विशेष ५)

‘रिभल्भिङ फण्ड’ मार्फत् विद्यार्थीलाई प्राविधिक शिक्षामा जोड दिने सुन्दरहरैंचाको योजना (नगर स्थापना दिवस विशेष ४)

सुन्दरहरैंचामा ४ वर्षमा डेढ सय किलोमिटर सडक कालोपत्रे, यस्ता छन् अन्य पूर्वाधारका योजना (नगर स्थापना दिवस विशेष ३)

नगर गौरवका योजनाअन्तर्गत पर्यटकीय क्षेत्रमा काम गर्दै सुन्दरहरैंचा (नगर स्थापना दिवस विशेष २)

फलफूल र बीउबिजनमा नगरलाई आत्मनिर्भर बनाउँदै सुन्दरहरैंचा (नगर स्थापना दिवस विशेष १)