सिद्धार्थ  स्कुल खोर्सानेमा कलिला हातले पेन्सिल समात्ने र अक्षर कोर्ने अथवा चिन्ने बेलादेखि चित्र बनाउन थालेकी अञ्जना राई अहिले एसईई दिएर कक्षा ११ मा पढ्ने तयारीमा छिन् । रंङसँग साइनो जोड्न कक्षा १ देखि नै चित्रकार भीम अधिकारीले अञ्जनालाई ‘गाइडलाइन दिएपछि उनी अहिले राम्राराम्रा अकृति बनाउन सक्ने भएकी छिन् ।

२०६० सालमा जन्मिएकी उनको सोख भनेको उत्कृष्ट चित्रकार बन्ने रहेको छ । आमा, बुबा, विद्यालयका प्रिन्सिपल, शिक्षक, किसानले खेतबारीमा काम गर्दै गरेको तस्बीर, मठ मन्दिर, विभिन्न चाडपर्वहरूको तस्बीर बनाउन अञ्जना खप्पिस छिन् ।  ‘मलाई भीम सरले हरेक तस्बीर बनाएबापत कहिले इरेजर, कहिले पेन्सिल दिनुहुन्थ्यो । हरेक तस्बीरमा गुड, भेरी गुड, एक्सिलेन्ट दिनुहुन्थ्यो,’ अञ्जना भन्छिन्, ‘त्यतिबेला म सानै थिएँ त्यसैमा लोभिएर झन् धेरै पुरस्कारको अपेक्षाले मिहिनेतलाई पुरस्कारसँग जोड्न थालेँ । त्यसकै प्रतिफल होला अहिलेसम्म चित्र रङ्गाउन छोडेको छैन ।

मैले शुरुमा छाना भएको घर बनाउन सिकेको हो । पुरानो घर अनि खरको छाना भएको तस्बिरमा रङ भर्दाभर्दै सरले पेन्सिलले स्केच बनाउन सिकाउनु भयो । मलाई सरले चित्र बनाउँदा सयमा सय नै माक्र्स दिँदाको त्यो खुशी अहिलेसम्म जीवनमा सबैभन्दा धेरै लाग्छ । त्यो दिन अहिलेजस्तो लाग्छ ।’ सानो उमेरमा स्कुलका साथीसँग प्रतिस्पर्धा गर्ने अञ्जना १० कक्षामा पुगेपछि नगरपालिकास्तरीय प्रतियोगितामा भाग लिएर दोस्रो स्थान हात पार्न सफल भइन् । उनले पहिलो प्रतियोगितामा किसानले वर्षायाममा असारको बेला खेतबारीमा काम गर्दै गरेको विषयवस्तुको आधारमा चित्र कोरेकी थिइन् ।

यस्तै जिल्लास्तरीय प्रतियोगितामा भाग लिन पथरी पुगेकी अञ्जनालाई नयाँ क्षेत्रको तस्बिर बनाउनुपर्यो । त्यो अलि कठिन लागेको उनी बताउँछिन् । उनी त्यो प्रतियोगिताबाट पनि छानिएपछि प्रदेश स्तरीय प्रतियोगितामा भाग लिन इन्द्रपुर जेसीज भवन विराटचोकमा पुगिन् । त्यहाँ भने उनलाई नेपालको संस्कृतिका बारेमा चित्र कोर्न लगाइएको थियो । त्यहाँ उनी प्रथम भइन् । यसले उनी चित्रकलामा अघि बढ्ने एउटा राम्रो मौका पाइन् ।  ‘मेरो इच्छा भनेको ललितकला केन्द्रमा आर्ट पढ्ने थियो तर कोरोनाले गर्दा त्यहाँ जान नपाएकोले दुःख लागेको छ,’ उनी भन्छिन्, ‘मेरो इच्छा राम्रो आर्टिक्स बन्ने हो । मलाई घरमा आमाले धेरै सपोर्ट गर्नुहुन्छ । विद्यालयका प्रिन्सिपल अर्जुन बस्नेत सरले पनि मलाई आर्ट नै पढ्नुपर्छ भन्नुभएको थियो ।’

अञ्जनाजस्ता प्रतिभा भएका व्यक्ति समाजमा कमै मात्रामा पाइन्छन् । यस्ता कला भएका बालबालिकाहरूलाई उनीहरूको रुचि अनुसार पढ्न पाउने वातावरण दिनुपर्ने हुन्छ ।

याे पनि पढ्नुहाेस्

मोडलिङ र नृत्यमा आफ्ने भविष्य देखेकी खुस्बु

ज्याब्लिङ थ्रोका अब्बल देवान

जादुमयी स्वरका कारण अघि बढ्दै गरेका दियोग