स्थानीय तथा राष्ट्रिय तथा अन्तराष्ट्रिय प्रतियोगितामा भाग लिन पाइरहँदा सहभागीको ध्यान बढी आकर्षित हुन्छ । यसले व्यक्तिमा प्रतिभाको निखारपन ल्याउन पनि सहयोग गर्छ ।

यसरी नै विभिन्न प्रतियोगितामा सहभागी हुँदै आफ्नो प्रतिभालाई प्रस्फुटन गर्दै सबै माझ मौलाइरहेका प्रतिभा हुन् स्वरुप खतिवडा । सिद्धार्थ सेकेण्डरी बोर्डिङ स्कुल सुन्दरहरैंचामा अध्ययनरत उनको प्रतिभा प्रस्फुटन गराउनमा पनि विभिन्न प्रतियोगिता तथा विद्यालय, घर र परिवारको महत्वपूर्ण भूमिका रहेको छ ।

भदौ ३ गते आफ्नो १५औँ जन्मदिन मनाएका खतिवडाको प्रतिभालाई प्रस्फुटन गराउन सहयोग गरे सुन्दरहरैंचाको स्कलर्स होमका शिक्षक कमल सिलवालले । उनलाई गीत गाउन प्रेरणा दिने सिलवाल सर काठमाडौंमा छन् । खतिवडा पनि अहिले सिद्धार्थ सेकेण्डरी स्कुल खोर्सानेमा अध्ययनरत छन् । उनलाई त्यहाँ शिक्षक जेबी थुलुङले हौसला दिनुको साथै आवश्यक सहयोग गरिरहेका छन् । ‘मलाई जेबी सरले सबै प्रतियोगितामा भाग लिन लगाउनुहुन्छ । मलाई अघि बढाउनमा उहाँको ९५ प्रतिशत योगदान छ ।’

स्कलर्स होममा उनले प्यारेन्ट्स डेमा गीत गाएका थिए । त्यसलगत्तै विराटचोकमा भएको एक कार्यक्रममा ‘फर्की आऊ शान्ति तिमी…’ बोलको गीत गाएका थिए । त्यो गीतमा राम्रो प्रस्तुति दिएपछि उनको प्रतिभाको कदर हुन थाल्यो ।

रियल स्कुल अफ नेपालले आयोजना गरेको ‘थ्री मिनेट्स अफ फेम’ प्रतियोगितामा उनी फस्ट रनर अप भए । सो प्रतियोगितामा ३ मिनेटभित्रमा आफ्नो कुनै पनि प्रतिभा प्रस्तुत गर्नुपथ्र्याे । त्यस्तै, विराटनगरमा भएको को बन्छ स्टार प्रतियोगितामा उनी तेस्रो भए । विराटनगरमा भएको एसबीएससी सिङ्गिङ स्टार प्रतियोगितामा पनि उनी तेस्रो भए । एक वर्ष अघि भएको प्रथम सुन्दरहरैंचा आइडलमा विजेता बनेपछि उनलाई झन् धेरैले चिन्न थाले ।

१ महिनासम्म सारेगम कलाशाला विराटचोकमा प्रशिक्षण लिएका उनी देशमा अहिले लकडाउन नभएको भए बेलबारीमा गएर संगीतको प्रशिक्षण लिइरहेका हुन्थे । त्यहाँ इटहरीका संगीतकार भोला राईले प्रशिक्षण दिन्छन् । त्यसो त उनलाई विराटनगर गएर कुशेश्वर गुरुसँग संगीत सिक्ने धोको पनि छ ।

गोपाल खतिवडा र संगीता खतिवडाका जेठो छोरा उनी भजन पनि गाउँछन् । विशेष गरी भक्तराज आचार्य, नारायण गोपाल र फत्तेमानका गीत गाउने उनी सेमी क्लासिकल गीत गाउन मन पराउँछन् । विद्यालय बन्द भएको अहिलेको समयमा उनी माइ माइक नेपाल नामक फेसबुक पेज खोलेर त्यसमा गीत अपलोड गर्ने गर्छन् ।

उनले परिवारबाट पनि राम्रो सहयोग पाइरहेका छन् । ‘कक्षा १ देखि नै गीत गाउन थालेको छोराको लागि परिवारको तर्फबाट सक्दो सहयोग गरिरहेका छौँ’, आमा संगीता भन्छिन्, ‘राष्ट्रिय प्रतियोगितामा जान हामी सहयोग गर्छाैँ । आवश्यक सामग्री पनि सबै दिइरहेका छौँ । हामीले भन्दा पनि धेरै विद्यालयले नै सहयोग गरेको छ । उसले राम्रो गरोस् भन्ने चाहना छ । गायन त उसले पाएको गड गिफ्ट झैँ लाग्छ ।’

सम्बन्धित समाचारहरु

आफ्नै आवाजमा गजल रेकर्ड गरिसकेका आयुष (बाल दिवस विशेष ५)

उत्कृष्ट चित्रकार बन्ने सपना कोरोनाले खाइदियो (बाल दिवस विशेष ४)

ज्याब्लिङ थ्रोका अब्बल देवान (बाल दिवस विशेष ३)

जादुमयी स्वरका कारण अघि बढ्दै गरेका दियोग (बाल दिवस विशेष २)

मोडलिङ र नृत्यमा आफ्नो भविष्य देखेकी खुस्बु (बाल दिवस विशेष १)

आज राष्ट्रिय बाल दिवस देशभर मनाइँदै