विराटचोकः कोरोना भाइरसको सङ्क्रमण विश्वका २ सयभन्दा बढी देशमा फैलिएको छ । सो भाइरसको सङ्क्रमणका कारण १ लाख ९ हजारभन्दा बढीले ज्यान गुमाइसकेका छन् । ३ लाख ६७ हजारभन्दा बढी मानिस निको भएर फर्किएका छन् । भाइरस फैलिएसँगै विश्वभरका मानिसमा एक किसिमको त्रास उत्पन्न भएको छ । भाइरसको सङ्क्रमण रोकथाम गर्न यतिखेर विश्वका धेरै देशमा लकडाउन, निषेधाज्ञा र कर्फ्यु लगाइएको छ । यसै क्रममा विभिन्न सिलसिलामा विदेशमा रहेका नेपालीसँग सामाजिक सञ्जालमा गरिएको कुराकानीमा आधारित रहेर यो सामग्री तयार पारिएको छ ।

एउटै अपार्टमेन्टमा बसे पनि भेटघाट नगरी बसेका छौँ
सन्तोष भट्टराई, अमेरिका

इलामको चुलाचुलीका सन्तोष भट्टराई अमेरिकाको भर्जिनियामा बस्छन् । भर्जिनियामा नै बस्ने एक जना नेपालीले अमेरिकामा खानै पाइँदैन भनी एउटा भिडियो सामाजिक सञ्जालमा ३ दिनअघि हालेका थिए । तर सो भिडियोमा भनेजस्तो समस्या नभएको उनको भनाइ छ । ट्वाइलेट पेपर र सेनिटाइजरको चाहिँ अभाव देखिएको अरु केहीको अभाव नभएको अनुभव उनीसँग छ ।

उनका अनुसार अमेरिकामा मार्च ३० तारिकदेखि लकडाउन छ । घरभित्रै बस्दा केही गाह्रो हुन्छ । सब्जी लिन मात्रै बाहिर जाने काम भइरहेको छ । रेस्टुरेन्ट खुलेका छन् तर रेस्टुरेन्टमै बसेर खान चाहिँ पाइँदैन ।

कतिपय स्टोर पनि खुला छन् । भर्जिनियामा १० जनाभन्दा बढी भेला नहुन सरकारले भनेको हुनाले त्यसको पालना भएको छ । ६ फुटको दूरी बनाएर मानिसहरु काम गरिरहेका छन् ।

मास्क र पञ्जा लगाएर तथा सावधानी अपनाएर मानिस काममा जाने तथा हिँडडुल गर्ने गर्छन् । धेरै जना होम क्वारेन्टाइनमै छन् । स्वास्थ्यकर्मीको आवश्यकता परेमा इमर्जेन्सी नम्बरमा फोन गर्नुपर्छ । त्यसपछि स्वास्थ्यकर्मीको सल्लाहअनुसार काम गर्नुपर्छ ।

धेरै नेपाली होम क्वारेन्टाइनमै बसेका छन् । एउटै अपार्टमेन्टमा बसे पनि पहिलो फ्ल्याट र दोस्रो फ्ल्याटमा बस्नेबीच भेटघाट हुँदैन । सबै सचेत भएरै बसिरहेका छन् ।

देशमा यस्तै अवस्था रहिरहेमा सरकारलाई राजस्व बुझाउने व्यक्ति (ट्याक्स पेयर) लाई १ हजार २ सय डलर दिने सरकारी घोषणा छ । ज्वाइन्ट ट्याक्स पे भए त्यसको दोब्बर दिने र १८ वर्षभन्दा मुनिका बच्चा भए प्रतिबच्चा ५ सय डलर दिने घोषणा गरेको छ । तर सो राहत रकम दिइसकेको चाहिँ छैन ।

नेपाली दूतावासले पनि सामाजिक दूरी कायम गर्दै अमेरिकी सरकारको नीतिअनुसार काम गर्न भनेको छ । एनआरएनएले नेपालीलाई आर्थिक सहयोग गरेको थाहा नभए पनि नेपाली डाक्टरसँग अन्तर्वार्ता लिएर सामाजिक सञ्जालमार्फत् जनचेतना फैलाउने काम भने गरिरहेको छ ।

जागिर गुमाउनेका लागि प्रति महिना २ हजार डलर सहयोग
विजय गौडेल, क्यानडा

क्यानडामा २३ हजार भन्दा बढी मानिस संक्रमित हुँदा हामी बसेको प्रान्त ब्रिटिस कोलम्बियामा लगभग २ हजार संक्रमित छन् । क्यानडामा शुरुमा २० ओटा केयर होमबाट संक्रमण फैलिएको बताइएको छ । जसका कारण मृत्यु हुनेमा बुढाबुढीको संख्या धेरै छ ।

शुरुमा इरान, इटाली, चीनबाट संक्रमित व्यक्ति आएको हुन सक्ने अनुमान गरिएको छ । सरकारले लकडाउनको घोषणा गरेको छैन तर आफसेआफ जनता घरभित्रै बसेका छन् ।

स्वास्थ्य सेवा दिने संस्था र ग्रोसरी खुला छन् । सार्वजनिक यातायात पनि खुला छन् तर १० जनाभन्दा बढी मानिस चढ्न पाइँदैन ।

बिहान १ घण्टा सिनियर सिटिजनको लागि बजार खुल्छ । सो समयमा अरु व्यक्ति किनमेल गर्न जान पाइँदैन । धेरै सामान किन्न पनि पाइँदैन ।

सेवामूलक काम गर्नेले कार्यालयमै गएर काम गर्नुपर्छ । केही जागिर घरमै बसेर गर्न पनि मिल्छ । धेरै जनाको भने जागिर गएको छ । जागिर गुमाउनेका लागि सरकारले २ हजार डलर महिनामा १ पटक दिन्छ । यो सुविधा विद्यार्थीलाई पनि छ ।

क्यानडाको हेल्थ केयर सिस्टम राम्रो भएकाले र सावधानी अपनाएको हुनाले त्यस्तो खराब अवस्था भने छैन । क्यानडामा रहेका नेपाली सामाजिक सञ्जाल र फोनमार्फत् जोडिएका छन् । गाह्रो क्यानडावासी सबैलाई छ तर एकदमै गाह्रो कसैलाई पनि छैन ।

धेरै जनाको जागिर गएपछि मनोवैज्ञानिक असर पर्छ तर त्यो नेपालीलाई मात्रै होइन सबैलाई पर्छ । सामाजिक दूरी पालना गर्न प्रहरीले सम्झाउनु परेको छैन । मान्छे हिँडिरहेका छन् । तर भीडभाड छैन । यसरी हेर्दा सरकारले राम्रै नियन्त्रण गरेको देखिन्छ ।

नेपालीहरुले नयाँ वर्षमा मन्दिरमा गएर कार्यक्रम गर्ने गरेका थिए । त्यो रोकिएको छ । बच्चाहरुलाई शनिबार नेपाली सिकाउने कार्यक्रम हुन्थ्यो । त्यो पनि रोकिएको छ ।

नेपालमा अहिले सरकारले गरेको काम सह्रानीय छ । देशलाई संकट पार्दा एक ढिक्का हुनुपर्छ । सबैले मिलेर गर्नुपर्छ । माग बढी भएपछि मूल्य बढाउने काम सबै देशमा हुन्छ । क्यानडामा पनि १० डलर पर्ने मास्क ५० डलरसम्म पुगेको थियो । २÷३ डलर पर्ने सेनिटाइजर १० डलरसम्ममा किन्नुपरेको थियो ।

कम आम्दानी हुने र निजी व्यवसाय गर्नेलाई समस्या छ
रामु चापागाईं, जापान

चितवनको भरतपुरका रामु चापागाई जापानको राजधानी टोकियोमा बस्छन् । उनका अनुसार आपत्काल घोषणा गरेपछि जापानमा व्यवसाय बन्द हुँदैछन् । शुक्रबारदेखि बार बन्द भए पनि फेमिली रेस्टुरेन्ट खुलै छन् । क्याफे खुलै छन् । दैनिक उपभोग्य सामान बिक्री गर्ने र भित्री सडकमा भएका पसल भने खुलै छन् । पसल खोलेमा सरकारबाट पाउने सुविधा कटौती हुनेछ भनिएको छ । अरु जरिवाना तोकिएको छैन ।

कम्पनीले काम पनि घटाएको छ । तलब पनि २५ प्रतिशत घटाएको छ । पार्ट टाइम काम गर्नेको काम नै बन्द भएको छ । मास्क र सेनिटाइजरको सबैले प्रयोग गर्छन् । आपत्काल घोषणा गरिए पनि आत्तिइहाल्नुपर्ने अवस्था भने छैन ।

परिवार र बालबच्चासँग बसेकालाई अझ बढी गाह्रो भएको छ । मेडिकल सिस्टम राम्रो छ त्यसैले महामारी फैलिँदैन भन्नेमा जापानी ढुक्क छन् । कम आम्दानी हुने र निजी व्यवसाय गर्नेलाई अलि बढी तनाव छ ।

सरकारले राहतको घोषणा गर्ने भनेको छ तर गरिसकेको छैन । १ महिनालाई पसल बन्द गर्ने भनिएको छ । मे ६ तारिकसम्म धेरै कम्पनीका कर्मचारीलाई बिदा दिइएको छ ।

ट्रेनमा भीड छैन । आपत्काल घोषणा गरिए पनि झण्डै ६० प्रतिशत मानिस घरबाहिर निस्किएका हुन्छन् । तर उनीहरु कोरोना संक्रमणबाट बच्न गरिने सबै उपाय पालना गर्छन् ।

नेपाली स्कुलमा अनलाइन क्लास शुरु भएको छ । हालसम्म संक्रमित नेपाली भेटिएका छैनन् । कोरोना भएको प्रमाणित भएमा सबै उपचार खर्च सरकारले नै बेहोर्ने भएको छ । सेनिटाइजर र मास्कको प्रयोग बढेको छ । एउटा अस्पतालमा स्वास्थ्यकर्मी संक्रमित भएपछि सो अस्पताल नै बन्द भएको छ ।

विदेशमा रहेका नेपालीको लकडाउन अनुभव (शृङ्खला ७)

विदेशमा रहेका नेपालीको लकडाउन अनुभव (शृङ्खला ६)

लेखक, साहित्यकारको लकडाउन अनुभव (शृङ्खला ५)

विदेशमा रहेका नेपालीको कोरोना कहर (शृङ्खला ४)

विदेशमा रहेका नेपालीको कोरोना कहर (शृङ्खला ३)

लकडाउनको समयमा विदेशमा रहेका नेपालीको अवस्था (शृङ्खला २)

कोरोनाको बारेमा यसो भन्छन् विदेशमा रहेका नेपाली (शृङ्खला १)