अहिलेका कतिपय विद्यार्थी मोबाइलमा भएका विभिन्न खेल खेलेर नै समय बिताइरहेका हुन्छन् । मोबाइल वा ल्यापटप पाए भने खेलेरै समय बिताउँछन् । त्यस्तै, टेलिभिजन हेर्न पाए भने कार्टुन हेरेरै दिन बिताउँछन् । तर, क्रस्मा राई भने यसको अपवाद हुन् । उनी टिभीमा समाचार, ज्ञानबद्र्धक कार्यक्रम र रियालिटी सो मात्रै हेर्छिन् । त्यस्तै, ल्यापटप वा मोबाइलमा पनि इन्टरनेटमार्फत् विभिन्न ज्ञानबद्र्धक विषय खोजिरहन्छिन् । अन्य धेरै विद्यार्थीको भन्दा अर्काे फरक विशेषता हो समाचारपत्र पढ्नु । सामान्य ज्ञानका पुस्तक पनि उनी पढिरहन्छिन् ।

सुन्दरहरैंचाको स्कलर्स होममा कक्षा १० मा अध्ययनरत उनी सामान्यज्ञानमा राम्रो दख्खल राख्छिन् । आफू सहभागी भएको प्रतियोगितामा उनी पुरस्कृत भएरै छाड्छिन् । धेरैजसो त उनी प्रथम पुरस्कार नै हात पार्छिन् । गत साता भर्चुअल माध्यमबाट भएको हाजिरीजवाफमा उनी तेस्रो भइन् । साइन्स टिचर्स एसोसिएसन अफ नेपाल प्रदेश नम्बर १ ले गरेको सो प्रदेशस्तरीय प्रतियोगितामा उनको समूह तेस्रो भएको हो । ७० वटा समूहले प्रतियोगितामा भाग लिएका थिए । उनी कक्षाको पनि पहिलो विद्यार्थी हुन् ।

वक्तृत्वकलामा पनि राम्रो प्रस्तुति दिन सक्ने उनी इन्द्रपुर जेसीजले ०७५ सालमा आयोजना गरेको हाजिरीजवाफ प्रतियोगितामा तेस्रो भइन् भने ०७६ सालमा गरेको प्रतियोगितामा पहिलो भइन् । गछिया जेसीज र पहिलो पाइला नेपाल नामक संस्थाले आयोजना गरेको प्रतियोगितामा दोस्रो भइन् । वाइएसएस नेपालले आयोजना गरेको प्रतियोगितामा उनी पहिलो भइन् ।

भविष्यमा डाक्टर बन्ने सपना देखेकी उनी सामान्य ज्ञानमा विज्ञानसम्बन्धी प्रश्नको उत्तर बढी मिलाउँछिन् । विद्यालयका शिक्षक माधव घिमिरे र तारा कार्कीले आफूलाई बारम्बार हौसला दिइरहने हुनाले अघि बढ्न थप प्रेरणा मिलेको उनको भनाइ छ । आफू समसामयिक घटनाक्रमका बारेमा जानकारी राख्ने हुनाले हाजिरीजवाफमा सजिलो भएको उनको भनाइ छ ।

‘घरमा भएका सामान्य ज्ञानका पुस्तक पढ्दै जाँदा र स्कुलमा अरुले क्वीज खेलेको देखेर म क्वीजप्रति आकर्षित भएँ’, उनी भन्छिन्, ‘टीभीमा समाचार हेर्छु अनि पत्रपत्रिका पनि पढिरहन्छु । त्यसैले समसामयिक विषयवस्तुमा पनि म अपडेट भइरहेकी हुन्छु ।’ त्यसैको परिणाम हो खेलकुद, इतिहास, विज्ञान, राजनीति, धर्म वा समसामयिक गतिविधि जेसुकैको प्रश्न सोधे पनि उनी सही जवाफ दिइहाल्छिन् ।

छोरीको रुचिमा आफूहरुले सक्दो सहयोग गरिरहेको उनकी आमा रचना श्रेष्ठ बताउँछिन् । कुनै पनि नयाँ समाचार आउनासाथ छोरीलाई जानकारी दिने तथा नयाँ समसामयिक ज्ञानको पुस्तक बजारमा आउनासाथ ल्याइदिने गरेको उनले सुनाइन् ।

सम्बन्धित समाचार

दौड र बुद्धिचालमा असामान्य प्रतिभा भएकी जेस्मिना (बाल दिवस विशेष ९)
मेकानिकल इञ्जिनियर बन्ने सपना बोकेका बाल चित्रकार अंकित (बाल दिवस विशेष ८)

अन्तर्राष्ट्रिय क्रिकेट प्रतियोगितामा म्यान अफ द म्याच बनेका सुमन (बाल दिवस विशेष ७)

स्वरुप खतिवडा: शास्त्रीय गीत गाउन मन पराउने सुन्दरहरैंचा आइडल (बाल दिवस विशेष ६)

आफ्नै आवाजमा गजल रेकर्ड गरिसकेका आयुष (बाल दिवस विशेष ५)

उत्कृष्ट चित्रकार बन्ने सपना कोरोनाले खाइदियो (बाल दिवस विशेष ४)

ज्याब्लिङ थ्रोका अब्बल देवान (बाल दिवस विशेष ३)

जादुमयी स्वरका कारण अघि बढ्दै गरेका दियोग (बाल दिवस विशेष २)

मोडलिङ र नृत्यमा आफ्नो भविष्य देखेकी खुस्बु (बाल दिवस विशेष १)