विराटचोकः साबिकका ५ वटा गाविस मिलाएर सुन्दरहरैंचा नगरपालिकाको घोषणा नेपाल सरकारले ४ वर्ष अघि २०७३ साल फागुन २७ गते गरेको हो । त्यसअघि सुन्दरपुर र दुलारी गाविस मिलाएर बनेको सुन्दरदुलारी तथा मृगौलिया, हरैंचा र इन्द्रपुर मिलाएर बनेको कोशीहरैंचाबीच एकीकरण भएर बनेको सुन्दरहरैंचामा केही काम नमूनायोग्य छन् ।

घरदेखि घाटसम्म
नगरपालिकाले घरदेखि घाटसम्म सेवा अन्तर्गत एउटा शववाहन सञ्चालनमा ल्याएको छ । नगरभित्र कसैको देहावसान हुँदा शवलाई मृतकको घरदेखि घाटसम्म निःशुल्क पुर्याउनका लागि सो वाहनको व्यवस्था गरिएको हो । हालसम्म सुन्दरहरैंचा र अन्य छिमेकी पालिकाका सहित लगभग १ हजार २ सय घरमा सो सेवा दिइएको नगरपालिकाले जनाएको छ । नगरपालिका स्रोतका अनुसार मोरङका स्थानीय तहमा सबैभन्दा शुरुमा सुन्दरहरैंचाले यो सेवा दिएको हो ।

वाकिङ स्ट्रिट
सुन्दरहरैंचा नगरपालिकाले वडा नम्बर १२ मा विराटचोक– विराटनगर सडक खण्डको दुवैतर्फ वाकिङ स्ट्रीट बनाएको छ । साँझ र बिहान प्रात भ्रमण तथा सन्ध्या भ्रमणमा निस्कने तथा दिउँसो पैदलयात्रीको सहजताको लागि सो स्ट्रिट बनाइएको हो ।

सो स्ट्रिट निर्माणको योजना दूरदर्शी र फरक किसिमको भए पनि त्यसको सही व्यवस्थापन र रेखदेख नहुँदा भने सडकको सौन्दर्य नै बिग्रिएको देखिन्छ । यस विषयमा जिज्ञासा राख्दा मेयर शिवप्रसाद ढकाल विराटचोक–घिनाघाट–विराटनगर सडकको काम सकिनासाथ वाकिङ स्ट्रिट बनाइसकेर त्यसको प्रयोग गर्ने बताउँछन् ।

पुस्तकालयसहितको सार्वजनिक शौचालय
नगरपालिकाभित्र एकै डिजाइनका ८ वटा अत्याधुनिक सार्वजनिक शौचालय बनाउने गरी काम भइरहेको छ । व्यवसायी भोलेश्वर दुलालको अग्रसरतामा शौचालय निर्माण शुरु भएर विराटचोक र सलकपुरमा सञ्चालनमा आइसकेका छन् । हालै मुख्यमन्त्री शेरधन राईले ती शौचालयको उद्घाटन गरे ।

ती शौचालय भवनको तल्लो तलामा आधुनिक प्रविधिका शौचालयका साथै स्मोकिङ जोन, सैलुन, विश्राम कक्ष लगायत रहेका छन् । दोस्रो तलामा अत्याधुनिक पुस्तकालय रहेको छ भने कार्यक्रम गर्नको लागि सेमीनार हलको व्यवस्था गरिएको छ । तेस्रो तलामा शौचालय सफाइ गर्ने श्रमिकको आवास रहेको छ ।

हरैंचा र खोर्सानेमा निर्माणाधीन अवस्थामा रहेका यस्ता शौचालय निर्माणको अन्तिम चरणमा रहेका छन् । मृगौलिया, गोठगाउँ, गछिया, दुलारी र बलियामा भने जग्गाको व्यवस्थापन हुन नसक्दा यस्ता शौचालय बन्न सकेका छैनन् ।

सम्बन्धित थप समाचारहरुः

स्थानीय मिडियालाई प्रवर्द्धन गर्ने दिशामा सुन्दरहरैंचाको प्रयास (नगर स्थापना दिवस विशेष ९)

नगरलाई चिनाउन पूर्वाधार विकास र खेलाडी प्रोत्साहनमा केन्द्रित सुन्दरहरैंचा नगरपालिका (नगर स्थापना दिवस विशेष ८)

मुख्य बजारमा शक्तिशाली तथा नाइट भिजन क्यामेरा राख्ने सुन्दरहरैंचाको तयारी (नगर स्थापना दिवस विशेष ७)

सुन्दरहरैंचाले ९० वर्षमाथिका ज्येष्ठ नागरिकलाई मासिक १ हजार रुपैयाँ भत्ता दिने (नगर स्थापना दिवस विशेष ६)

स्वास्थ्यको क्षेत्रमा यसरी अघि बढ्दैछ सुन्दरहरैंचा नगरपालिका (नगर स्थापना दिवस विशेष ५)

‘रिभल्भिङ फण्ड’ मार्फत् विद्यार्थीलाई प्राविधिक शिक्षामा जोड दिने सुन्दरहरैंचाको योजना (नगर स्थापना दिवस विशेष ४)

सुन्दरहरैंचामा ४ वर्षमा डेढ सय किलोमिटर सडक कालोपत्रे, यस्ता छन् अन्य पूर्वाधारका योजना (नगर स्थापना दिवस विशेष ३)

नगर गौरवका योजनाअन्तर्गत पर्यटकीय क्षेत्रमा काम गर्दै सुन्दरहरैंचा (नगर स्थापना दिवस विशेष २)

फलफूल र बीउबिजनमा नगरलाई आत्मनिर्भर बनाउँदै सुन्दरहरैंचा (नगर स्थापना दिवस विशेष १)